परासी । जिल्ला प्रशासन कार्यालय नवलपरासी (बर्दघाट सुस्ता पश्चिम) ले राष्ट्रिय स्वतन्त्र पार्टीका सभापति रवि लामिछानेको कार्यक्रमलाई लक्षित गर्दै निर्वाचन आचारसंहिताको पूर्ण पालना गर्न निर्देशन दिएको छ। प्रतिनिधि सभा सदस्यको आसन्न निर्वाचनका सन्दर्भमा निर्वाचन आयोगले आचारसंहिता, २०८२ लागु गरिसकेको अवस्थामा यही माघ २७ गते जिल्लामा तय भएको लामिछानेको 'जनसम्पर्क तथा घण्टी अभिवादन कार्यक्रम' का सन्दर्भमा प्रशासनले ध्यानाकर्षण जनाएको हो।
सहायक प्रमुख जिल्ला अधिकारी एवं निर्वाचन आचारसंहिता अनुगमन अधिकृत पोषन राज भण्डारीद्वारा जारी सूचनामा, उक्त कार्यक्रमका क्रममा निर्वाचन आचारसंहिता आकर्षित हुने हुँदा आचारसंहिता विपरितका कुनै पनि गतिविधि नगर्न र नगराउन सम्बन्धित सबै पक्षलाई सचेत गराइएको छ। निर्वाचनलाई स्वतन्त्र, निष्पक्ष र मर्यादित बनाउन आयोगले माघ १४ गतेदेखि नै आचारसंहिता लागु गरिसकेको प्रशासनले स्मरण गराएको छ।
