अर्घाखाँची । भूमिकास्थान नगरपालिकाले आगामी आर्थिक वर्ष २०८२/८३ का लागि ८३ करोड ९४ लाख ७४ हजार रुपैयाँको बजेट ल्याएको छ । नगरसभाको १७ औं अधिवेशनमार्फत उपप्रमुख बालकृष्ण बञ्जाडेले सार्वजनिक गरेको बजेटमा चालुतर्फ ५४ करोड १६ लाख ८९ हजार, पुँजीगत २९ करोड ७७ लाख ८५ हजार रुपैयाँ रहेको छ ।
संघ सरकारबाट सर्शत अनुदान ३४ करोड ६८ लाख, समानीकरण ११ करोड १४ लाख, राजश्व बाँडफाँट १० करोड ७ लाख, संघको विशेष अनुदान ६८ लाख र समपूरक अनुदान १ करोड १२ लाख प्राप्त हुने अनुमान रहेको छ ।
लुम्बिनी प्रदेशबाट सर्शत १ करोड १५ लाख, समानीकरण ७६ लाख, राजश्व बाँडफाँट १ करोड ४० लाख, विशेष अनुदान १८ लाख र समपुरक ११ करोड २० लाख रुपैयाँ हुने एवं भूमिकास्थान नगरपालिकाको आन्तरिक आम्दानी ८२ लाख हुने प्रारम्भिक अनुमान रहेको बञ्जाडेले बताए ।
भूमिकास्थानले कृषि उत्पादन, शिक्षा, स्वास्थ्य, पूर्वाधार विकास र समाजिक विकासलाई बजेटमा प्राथमिकता दिएको छ । नगरले बाँझो जग्गा लिएर दुई वर्षदेखि खती गर्दै आएको छ । ३ सय २९ रोपनी क्षेत्रफलमा प्याज, अकबारे खुर्सानी, मकैको बीउ उत्पादन र धान खेती गर्दै आएको छ । कर्मशील जनशक्ति परिचलान गरी नगर आफैं उत्पादनमा लागेको छ ।
यस आर्थिक वर्ष २ सय ५० जनाले रोजगारी पाएका छन् भने आगामी आर्थिक वर्षमा १ सय ५० जनालाई प्रत्यक्ष रोजगारी दिने लक्ष्य रहेको नगरपालिका सूचना अधिकारी हरिश्चन्द्र भुसालले बताए । अप्रत्यक्ष रुपमा ३ सय जनाले कर्मशील जनशक्ति परिचालनमा रोजगारी पाउने अनुमान रहेको छ । ५० रोपनी खेती गर्ने क्षेत्रफल अर्को वर्ष थपिने पनि भुसालले बताए ।
