भैरहवा । रुपन्देहीको भैरहवामा आयोजित सातौं लुम्बिनी महोत्सव–२०८२ सफलतापूर्वक सम्पन्न भएको छ । चेम्बर अफ कमर्श, रुपन्देहीको आयोजनामा मंसिर ३ देखि २१ गतेसम्म सञ्चालित महोत्सवमा करिब १२ करोड रुपैयाँ बराबरको कारोबार भएको छ भने झण्डै १ लाख २० हजार दर्शकले अवलोकन गरेका छन् । स्थानीय उत्पादन र बजार प्रबद्र्धन गर्ने उद्देश्यले आयोजित महोत्सवमा ३ सय वटा स्टल राखिएका थिए । यसपटक नेपालमै पहिलो पटक भियतनामबाट ल्याइएको 'फिस टनेल' र 'जलपरी' महोत्सवको मुख्य आकर्षण बनेका थिए ।
समापन समारोहमा बोल्दै लुम्बिनी प्रदेशका आर्थिक मामिला मन्त्री धनेन्द्र कार्की र खेलकुद मन्त्री सन्तोष कुमार पाण्डेयले महोत्सवले सुस्त रहेको आर्थिक गतिविधिलाई चलायमान बनाउन र पर्यटन प्रबद्र्धनमा मद्दत पुर्याएको बताए। आयोजक संस्थाका अध्यक्ष सचिन रोक्काले भैरहवामा स्थायी प्रदर्शनी मण्डप नहुँदा वर्षेनी अस्थायी संरचनामा ठूलो रकम खर्चनुपरेको गुनासो गरेका थिए ।
