काठमाडाै । लुम्बिनी प्रदेशका सभामुख तुलाराम घर्ती मगरले लुम्बिनी प्रदेशका मगर समुदायको बहुल्य क्षेत्रलाई मगरात विशेष सास्कृतिक संरक्षण क्षेत्र बनाउन सकिने बताउनु भएको छ ।
प्रदेश निर्माण गर्दा मगरात क्षेत्र बिभाजित भएको बताउनु हुँदै उहाँले भाषिक सास्कृतिक दृष्टिकोणलाई मध्यनजर गरि मगरात विशेष क्षेत्र बनाउन सकिने बताउनु भयो । अन्तर्राष्ट्रिय मगर महासंघले आज काठमाडौंमा आयोजना गरेको "मगर अन्तर्राष्ट्रिय सेमिनार-२०८० लाई सम्बोधन गर्नुहुदै लुम्बिनी प्रदेशका सभामुख घर्ती मगरले विशेष क्षेत्र निर्माणको लागी मगर समुदायका अगुवाहरुको चासो र चिन्ता आवश्यक रहेको बताउनु भयो ।
नेपाल भाषा आयोगले लुम्बिनी प्रदेशमा सरकारी कामकाजको भाषाको लागि मगर भाषालाई सिफारिस नगरेता पनि प्रदेश सरकारले आवश्यक ठानेमा बाहुल्यताको आधारमा मगर भाषालाई सरकारी कामकाजी भाषा बनाउन सकिने उहाँले बताउनु भयो ।
उहाँले भन्नुभयो -" मैले मुख्यमन्त्री ज्यु संग कुरा गरिसकेको छु , लुम्बिनीमा अबधि थारु र मगर भाषालाई सरकारी कामकाजी भाषा बनाइने छ । " सभामुख घर्ती मगरले महासंघका अगुवाहरुलाई मगर समुदायको बौद्धिक र आर्थिक बिकासमा जोडी योजना बनाउन समेत सुझाव दिनु भयो । सेमिनारमा विभिन्न देशमा कृयासिल मगर संघका अगुवाहरुको सहभागीता रहेको थियो ।
