भैरहवा । प्रधानमन्त्री कप एक दिवसीय क्रिकेट प्रतियोगितामा सुदूरपश्चिम प्रदेशले विजयी सुरुआत गरेको छ ।भैरहवाको सिद्धार्थ रंगशालामा आज भएको आफ्नो पहिलो खेलमा लुम्बनी प्रदेशलाई ५ विकेटले पराजित गर्दै सुदूरपश्चिमले विजयी सुरुवात गरेको हो ।
लुम्बिनीको भने यो पहिलो हार हो । यसअघि लुम्बिनीले आफ्नो पहिलो खेलमा गण्डकी प्रदेशलाई पराजित गरेको थियो ।
सोमबार लुम्बिनीले दिएको १५९ रनको लक्ष्य सुदूरपश्चिम प्रदेशले २९.३ ओभरमा ५ विकेट गुमाएर पूरा गर्यो ।सुदूरपश्चिमको जितमा शेर मल्लले नटआउट ४२ रनको पारि खेदा खडक बोहराले २१ रनको योगदान गरे ।
यसैगरी नारायण जोशीले नटआउट २२ रन बनाउँदा टेक रावतले १८ तथा किरण ढगुन्नाले १६ रन बनाए । नरेभ भाटको ब्याटबाट १२ रन बनेको थियो । लुम्बिनीका अभिषेक गौतमले ३ विकेट लिँदा कृष्ण कार्की र अजय चाहानले एक एक विकेट लिए ।
पहिले ब्याटिङ गरेको लुम्बिनीले ४८.४ ओभरमा सवै विकेट गुमाएर १५८ रन बनाएको थियो । लुम्बिनीका लागि प्रज्वल थापाले सर्वाधिक ४२ रन बनाउँदा मोहमद हुसेनले २६ रन बनाए । यसैगरी मृनल गुरुङले १४ तथा कृष्ण कार्कीले १२ रनको नटआउट पारि खेले । दिल्सद अलील १० रनमा रनआउट भएका थिए ।
सुदूरपश्चिमका लागि नारायण जोशीले ३ विकेट लिँदा भोजराज भाट र नरेन साउदले दुई दुई विकेट लिए । यसैगरी मिलन बोहराले एक विकेट लिएका थिए ।
