गुल्मी । नेकपा एमाले गुल्मीको १२ औं अधिवेशनको केन्द्रीय उपमहासचिव प्रदिप ज्ञवालीले उद्घाटन गर्नुभएको छ । सदरमुकाम तम्घासको इन्द्रेणी पार्टी प्यालेसमा सुरू भएको अधिवेशनको ज्ञवालीले उद्घाटन गरेका हुन् । अधिवेशनको खुल्ला शत्रको कार्यक्रम सञ्चालन भइरहेको छ । आजबाट सुरु भएको अधिवेशन दुई दिनसम्म चल्नेछ ।
अधिवेशनका लागि यस जिल्लाका १२ वटै पालिका र ९३ वटै वडाबाट ५८५ जना प्रतिनिधि छनोट भएका नेकपा एमाले रेसुंगा नगर कमिटी अध्यक्ष हरिप्रसाद पोखरेलले जानकारी दिए ।
उनका अनुसार ११७ जना आयोजक कमिटी र ९८ जना जनवर्गीय सङ्गठनबाट समेत अधिवेशन प्रतिनिधि रहने छन् । अधिवेशनका लागि कूल प्रतिनिधिको ५ प्रतिशत प्रतिनिधि मनोनीत गर्न सकिनेछ ।
अधिवेशनबाट आगामी तीन वर्षका लागि १०५ जनाको जिल्ला कमिटी निर्वाचित हुनेछ । जसमध्ये पाँच जनाको पदाधिकारी हुनेछ । एमाले गुल्मीमा १० हजार बढी सङ्गठित सदस्य रहेको पार्टीले जनाएको छ ।
तम्घासमा हुन लागेको अधिवेशनमा एमालेका उपमहासचिव प्रदीप ज्ञवाली, केन्द्रीय सचिवद्वय गोकर्ण विष्ट र पद्मा अर्याल, गुल्मी जिल्ला इन्चार्ज सूर्य थापा, लुम्बिनी प्रदेश अध्यक्ष राधाकृष्ण कँडेल, केन्द्रीय सदस्यहरू, प्रदेशका नेताहरू लगायतका नेताहरूले सहभागी छन् ।
