काठमाडौं । विद्यालय तहका पाठ्यपुस्तकमा रहेका त्रुटीहरू आगामी शैक्षिक सत्रदेखि लागु हुने गरि सच्याँउन अनेरास्ववियुले पाठ्यक्रम विकास केन्द्रका महानिर्देशक इम नारायण श्रेष्ठको ध्यानाकर्षण गराएको छ ।
विद्यालय तहमा अध्ययनरत करिब ५६ लाख ७६ हजार २ सय ९२ बढि विद्यार्थीलाई पाठ्यपुस्तक मार्फत गलत पुस्तक पढाउन बाध्य पार्ने पाठ्यक्रम विकास केन्द्र, महानिर्देशकसंग अनेरास्ववियु काठमाडौं जिल्ला कमिटीका इन्चार्ज धर्मराज तिमल्सिनाको नेतृत्वमा तत्काल पाठ्यपुस्तकमा रहेका गल्ती सच्याँउन ध्यानाकर्षण गराएको छ ।
‘पाठ्यक्रम विकास केन्द्रले ७७ वटै जिल्लामा रहेका करिब ३५ हजार ६७४ भन्दा बढि विद्यालयमा गलत शिक्षा पढ्न बाध्य पारेर, राज्यको लगानी माथी गम्भीर घात गरेको, अभिभावकका सपना कुल्चिने दुस्प्रयास गरेको छ । विद्यार्थीको भविष्यसंग, विवेकसंग, जवानीसंग, समय र श्रमसंग खेलबाड गरेको छ । राज्य कोष दुरुपयोग गरेको छ । यसमा संलग्न जिम्मेवार, विषय समितीहरु, व्यक्तिहरु तथा संयन्त्रहरुको यो गैरजिम्मेवारीपन अक्षम्य रहेको छ । तत्काल पाठ्यपुस्तकमा भए, गरेका कमि कम्जोरी सच्याउन छानबिन गरि, २०८२ मा प्रकाशित हुने पाठ्यपुस्तकमा सच्याएर मात्रै प्रकाशित र वितरण गरिनुपर्छ। पाठ्यक्रम विकास केन्द्रको यस प्रकारको लापरबाहीले, यहाका समितिको लापरबाहीले सरकारी डकुमेन्ट प्रतिको विश्वास टुटेको छ । ’ ध्यानाकर्षण पत्रमा भनिएको छ ।
साथै वि.सं. २०७८ कार्तिक–मंसिर महिनामा सम्पन्न राष्ट्रिय जनगणना २०७८ को अन्तिम नतिजा २०७९ चैत्र १० गते नै राष्ट्रिय तथ्याङ्क कार्यालयले सार्वजनिक गरेकोमा हालसम्म पनि कक्षा १० को पाठ्यपुस्तकमा राष्ट्रिय जनगणना २०६८ कै तथ्याङ्क राखिनु, राष्ट्रिय जनगणना २०७८ को अन्तिम नतिजा प्रकाशित भैइसकेको जानकार नहुनु, नेपालको कुल जनसंख्या २,९१,६४,५७८ रहेको विषय यो पाठ्यक्रम विकास केन्द्र अनभिज्ञ रहनु दुखद भएको जनाएको छ ।
त्यसैगरी गलत पुस्तक पढ्नु पनि विषपान सरह हो, दिगोको अर्थ अरूलाई पिडा दिने वा असर पुर्याउने काम हैन! यस प्रकारका थुप्रै त्रुटीहरू छन । यस प्रकारका त्रुटीलाई तत्काल सच्याउन, त्रुटी देखेर पनि अन्देखा नगर्न र पाठ्यक्रम विकास केन्द्रसंग आम बालबालिकाको भविष्य जोडिएको हुँदा बालबालिकाको भविष्य संग , राज्यको भविष्य संग खेलबाड नगर्न जिम्मेवार, जवाफदेही बन्न पाठ्यक्रम विकास केन्द्रका महानिर्देशक इम नारायण श्रेष्ठलाई ध्यानाकर्षण पत्र बुझाइएको हो ।
