भैरहवा । रुपन्देहीको सिद्धार्थनगर नगरपालिका–१ स्थित भन्सारगल्ली क्षेत्रबाट भारतबाट अवैध रूपमा भन्सार छली ल्याउँदै गरिएको ठूलो परिमाणको लत्ताकपडा सशस्त्र प्रहरीले बरामद गरेको छ। सशस्त्र प्रहरी बल, नेपाल सीमा सुरक्षा गुल्म हे.क्वा. डण्डा रुपन्देहीबाट सशस्त्र प्रहरी नायव उपरीक्षक गोपीकृष्ण भट्टराईको कमाण्डमा खटिएको टोलीले सोमबार बिहान ७:२५ बजेको समयमा उक्त कपडा नियन्त्रणमा लिएको हो।
गोप्य सूचनाका आधारमा टोलीले भारतबाट भन्सार नतिरी नेपालतर्फ अवैध रूपमा भित्र्याइँदै गरेको पाँच लाख पचास हजार बराबरको लत्ताकपडा बरामद गरिएको सशस्त्र प्रहरीले जनाएको छ । बरामद गरिएका सम्पूर्ण सामानहरू आवश्यक कानुनी कारबाहीका लागि भैरहवा भन्सार कार्यालय बुझाउने प्रक्रिया अगाडि बढाइएको छ। सीमा क्षेत्रमा हुने अवैध चोरीपैठारी तथा राजस्व चुहावट नियन्त्रणका लागि गस्ती र निगरानी तीव्र पारिएको सीमा सुरक्षा गुल्मले जनाएको छ।
