काठमाडौं । अख्तियार दुरुपयोग अनुसन्धान आयोगले चिकित्सा विज्ञान राष्ट्रिय प्रतिष्ठान, वीर अस्पताल, काठमाडौंमा कार्यरत लेखा अधिकृत ढुण्डी राज दाहाललाई एक लाख २० हजार ८५० रुपैयाँ घुस रकमसहित नियन्त्रणमा लिएको छ ।
विभिन्न सप्लायर्स कम्पनी र ठेकेदारहरूलाई नियमानुसार भुक्तानी गर्नुपर्ने बिल रकम भुक्तानी गर्दा घुस लिएको भन्ने सूचना र उजुरीका आधारमा अख्तियार दुरुपयोग अनुसन्धान आयोग, टंगालबाट खटिएको टोलीले दाहाललाई उनकै कार्यकक्षबाट पक्राउ गरेको हो।
अख्तियारका प्रवक्ता राजेन्द्र कुमार पौडेलले जारी गरेको प्रेस विज्ञप्तिअनुसार, दाहालको कार्यकक्षबाट घुसबापतको रकम, एक थान मोबाइल डिभाइस र अन्य सम्बन्धित कागजातहरू बरामद गरिएको छ। घटनाबारे थप अनुसन्धान भइरहेको अख्तियारले जनाएको छ।
वीर अस्पतालका लेखा अधिकृत ढुण्डी राज दाहाल एक लाख २० हजार ८५० रुपैयाँ घुससहित पक्राउ
२६ अशोज २०८२, आइतबार
