काठमाडौँ । पूर्वराजा ज्ञानेन्द्र वीरविक्रम शाहदेवले नेपाली समाजमा धार्मिक, सांस्कृतिक तथा सामाजिक सद्भाव कायम राख्न सबैसँग आग्रह गर्नुभएको छ। बिहीबार एक सन्देश जारी गर्दै उहाँले नेपाल निर्माणको प्रारम्भदेखि नै नेपालीहरू आपसी मेलमिलाप, सद्भाव र भाइचाराका साथ बस्दै आएकाले बहुजातीय, बहुभाषिक तथा बहुधार्मिक नेपाली समाजको यही विशेषताले विश्वमा नेपालको पहिचान र सम्मान स्थापित भएको उल्लेख गर्नुभएको छ।
हरेक समुदायले आफ्नो धर्म, संस्कृति, परम्परा र आस्थालाई सम्मान गर्दै आएको परम्परालाई जोगाइराख्नुपर्नेमा जोड दिँदै पूर्वराजा ज्ञानेन्द्रले नेपालको मौलिक पहिचान र गौरवमा कसैले पनि खलल पुर्याउन नहुने बताउनुभएको छ। केही दिनअघि सुनसरीका केही गाउँबस्तीमा भएको आपसी विवादका कारण जनधनको क्षति भएको र त्यसको प्रभाव कोशी प्रदेश तथा तराईका विभिन्न क्षेत्रमा फैलिँदा जनजीवन प्रभावित भएको घटनाप्रति उहाँले दुःख व्यक्त गर्नुभएको छ।
नेपाल सामाजिक सद्भाव र सामञ्जस्यका लागि परिचित मुलुक भएको उल्लेख गर्दै उहाँले यस्ता अवाञ्छित घटना र द्वन्द्व मुलुकको मौलिक मूल्य र मान्यताविपरीत भएको बताउनुभएको छ। सन्देशमा उहाँले देशका जुनसुकै भूभागमा बसोबास गर्ने सबै नेपालीलाई एकता, सहिष्णुता र आपसी सद्भाव कायम राख्दै मिलेर अघि बढ्न आह्वान गर्नुभएको छ।
