भैरहवा । जिल्ला प्रहरी कार्यालय रुपन्देहीले लागुऔषध ब्राउनसुगरसहित एक युवकलाई पक्राउ गरेको छ । पक्राउ पर्नेमा रुपन्देहीको मायादेवी गाउँपालिका वडा नं. ३ बस्ने २४ वर्षीय दिपेन्द्र चाई रहेका छन् । लागुऔषध नियन्त्रण ब्यूरो शाखा कार्यालय भैरहवा र जिल्ला प्रहरी कार्यालय रुपन्देहीबाट खटिएको संयुक्त प्रहरी टोलीले चाईलाई सिद्धार्थनगर नगरपालिका–१ बेलहिया क्षेत्रबाट नियन्त्रणमा लिएको थियो ।
प्रहरीले सोधपुछ गर्दा उनले आफ्नो घरको कोठामा लागुऔषध लुकाएको स्वीकार गरेका थिए । निजको बयानका आधारमा मायादेवीस्थित घरमा खानतलासी गर्दा २६ ग्राम ३२० मिलिग्राम (प्लास्टिकसहित २८ ग्राम २९० मिलिग्राम) ब्राउनसुगर जस्तो देखिने पदार्थ र तौल गर्न प्रयोग हुने एक थान डिजिटल तराजु बरामद गरिएको छ । घटनाबारे थप अनुसन्धान भइरहेको जिल्ला प्रहरी कार्यालय रुपन्देहीका सूचना अधिकारी एवं प्रहरी नायव उपरीक्षक सुरज कार्कीले जानकारी दिएका छन् ।
