भैरहवा । प्रधानमन्त्री कप पुरुष राष्ट्रिय क्रिकेट प्रतियोगितामा नेपाल पुलिस क्लबले अपराजित यात्रा कायम राखेको छ । बिहिबार भएको खेलमा बागमती प्रदेशलाई ९३ रनले पराजित गर्दै पुलिसले प्रतियोगितामा लगातार सातौ जित निकालेको छ ।
२९८ रनको लक्ष्य पछ्याएको बागमती ४५.२ ओभरमा आफ्ना सबै विकेट गुमाउदै २०४ रन मात्र बनाउन सक्यो । बागमतीका लागि ईशान पाण्डेले ७० रन बनाए पनि त्यो जितको लागि प्रयाप्त हुन सकेन । यस्तै शुभ कंसाकारले ३६ रन र विपिन आचार्यले २० रन बनाए ।
बलिङमा पुलिसका ललित राजवंशीले ४ विकेट, कुशल भुर्तेलले ३ विकेट, करण केसीले २ विकेट र गुलशन झाले १ विकेट लिए ।
यस अघि नेपाल पुलिस क्लबले रूपन्देहीकै एक्स्ट्राटेक ओभल क्रिकेट रङ्गशालामा टस जितेर ब्याटिङको निर्णय गरेको गर्दै ८ विकेटको क्षतिमा २९६ रन बनाएको थियो । पुलिसका लागि कुशल भुर्तेलले ८८ रन, दिपेन्द्र सिंह ऐरीले ६० रन र अमित श्रेष्ठले ४८ रन बनाएका थिए ।
बलिङमा प्रतिश जिसीले ३ विकेट लिनुभयो भने रिजन ढकाल, इशान पाण्डे, शंकर गजुरेल र विपिन आचार्यले समान १/१ विकेट लिए ।
यस संगै ७ खेलेको पुलिस सबैमा जित निकाल्दै १४ अंक सहित प्रतियोगिताको शिर्ष स्थानमै कायम छ भने ६ खेलमा ४ अंक सहित बागमती अंकतालिकामा आठौं स्थानमा झरेको छ ।
यसै गरि लुम्बिनी प्रदेश आफ्नै गृह मैदानमा कर्णालीद्वारा ५ रनले पराजित भएको छ । २०६ रन सामान्य लक्ष्य पछ्याएको लुम्बिनी अन्तिम ओभरमा आफ्नो सबै विकेट गुमाउदै २०० रन मात्र बनाउन सक्यो । लुम्बिनीका लागि सबै भन्दा बढी रन प्रज्वल थापाले बनाए । उनले ८४ रन बनाए भने कप्तान देव खनालले ४० रन बनाए । आकाश त्रिपाठीले २१ रन र मनिष थापाले १६ रन बनाए ।
बलिङमा कर्णालीका दिनेश अधिकारी र दिपेन्द्र रावतले समान ३/३ विकेट लिदा प्रकाश जैसीले २ विकेट लिए । यसै गरि दिवन पुन र सुनिल धमलाले समान १/१ विकेट लिए ।
यस अघि भैरहवा स्थित सिद्धार्थ क्रिकेट रङ्गशालामा टस जितेर ब्याटिङ रोज्दै कर्णालीले ४८.५ ओभरमा सबै विकेट गुमाउदै २०५ रन बनाएको थियो । कर्णालीका लागि दिपेन्द्र रावतले ६६ रन, अर्जुन घर्तिले ५६ रन बनाए । यसै गरि सुनिल धमलाले १९ रन र दिनेश अधिकारीले १६ रन बनाए ।
बलिङमा लुम्बिनी प्रदेशका रमेश कुर्मीले ३ विकेट, निर्मल गुरुङ, अजय चौहान र विप्रसन केसीले समान २/२ विकेट लिए ।
७ खेल खेलेको लुम्बिनी प्रदेश ४ मा जित र ३ मा हार गरि ८ अंक सहित तेश्रो स्थानमै कायम रहेको छ भने ६ खेल खेलेको कर्णाली ६ अंक सहित अंकतालिकामा पाचौं स्थानमा उक्लेको छ ।
शुक्रबारको खेल सिद्धार्थ रङ्गशालामा शसस्त्र प्रहरी बल र सुदूरपश्चिम र एक्स्ट्राटेक ओभल क्रिकेट रङ्गशालामा कर्णाली प्रदेश र मधेश प्रदेश बिच हुनेछ ।
