नवलपुर । नवलपुरको देवचुली नगरपालिका-१ स्थित देवी गैरा सामुदायिक वनमा सालनाल सहितको एक नवजात शिशु मृत अवस्थामा फेला परेको छ । सडक छेउमा तन्नामा पोको पारेर फालिएको अवस्थामा शिशुको शव देखेपछि स्थानीयले प्रहरीलाई खबर गरेका थिए ।
नवलपुर प्रहरीका अनुसार मृत फेला परेको शिशु छोरा हो। सूचना पाउनासाथ इलाका प्रहरी कार्यालय रजहरबाट प्रहरी टोली घटनास्थलमा पुगेर अनुसन्धान सुरु गरेको छ । घटनास्थल इलाका प्रहरी कार्यालयबाट करिब ४-५ किलोमिटर दक्षिण-पश्चिममा पर्दछ ।
प्रहरीले घटनाको सम्बन्धमा थप अनुसन्धान गरिरहेको जनाएको छ। शिशुलाई कसले र किन यसरी फालेको हो भन्ने बारे खुल्न सकेको छैन । प्रहरीले आसपासका क्षेत्रमा सोधपुछ तथा अनुसन्धानलाई तीव्रता दिएको छ।
