पाल्पा । जिल्ला प्रशासन कार्यालय र जिल्ला प्रहरी कार्यालय पाल्पाको संयुक्त आयोजनामा तानसेनमा नागरिक सुनुवाई कार्यक्रम सम्पन्न भएको छ । तानसेन नगरपालिका–४ स्थित जिल्ला प्रशासन कार्यालयको प्राङ्गणमा आयोजित उक्त कार्यक्रममा विशेषगरी जिल्ला प्रहरी कार्यालयबाट प्रवाह हुने सेवा सुविधाहरूको विषयमा केन्द्रित रही छलफल गरिएको थियो ।
जिल्ला समन्वय समिति पाल्पाका प्रमुख टंकनाथ खनाल, प्रमुख जिल्ला अधिकारी बिनु कुँवर बज्राचार्य लगायत सुरक्षा समितिका पदाधिकारी, विभिन्न सरकारी कार्यालयका प्रमुख, राजनीतिक दलका प्रतिनिधि तथा स्थानीय समाजसेवीहरूको उपस्थितिमा कार्यक्रम सञ्चालन भएको हो । सो अवसरमा जिल्ला प्रहरी कार्यालय पाल्पाका प्रमुख प्रहरी उपरीक्षक दिपेन्द्र पंजियार थारुले सहभागीहरूबाट आएका गुनासाहरू सुन्दै तिनको जवाफ दिनुभएको थियो । सार्वजनिक सेवा प्रवाहलाई थप प्रभावकारी र जनमुखी बनाउने उद्देश्यले उक्त कार्यक्रमको आयोजना गरिएको हो ।
