पोखरा । पोखरा महानगरपालिकाका प्रमुख धनराज आचार्यले सबै ठाउँलाई सडकसञ्जालले जोड्ने काम भईरहेको बताएका छन् । आइतबार लामाचौर तीज महोत्सवको उद्घाटन गर्दै नगर प्रमुख आचार्यले पोखराको सबै नाका जोडिने गरी सडक विस्तारको काम भईरहेको बताए ।
उनले भने, ‘नेपाल सरकारको समपुरकको लागि प्राप्त हुने बजेटमा गएको तीन वर्षदेखी एउटै मात्र कार्यक्रम हामीले भरेर पठाएका छौ । त्यो कम्तिमा माछापुच्छ्रेसम्म जाने सडक बनोस् भनेर अर्को वर्ष हामी माछापुच्छ्रेसम्म पुग्नेछौ । यसो हुँदा यहाँको उत्तरी क्षेत्र यसले कभर गर्नेछ भने पोखराको पूर्वी क्षेत्रमा रुपादेखी देउरालीसम्म पुग्ने बाटो पक्का गरिसकेका छौ । दक्षिणतर्फ कुरिनटारदेखी दोभिलाहुँदै विरौटासम्म आउने बाटो बनेको छ ।’
उनले पश्चिमतर्फको राजमार्ग र सिदार्थ राजमार्गको स्तरउन्नितिको काम हुँदै गरेको पनि जाकारी दिए । आइतबारबाट सुरु भएको लामाचौर तीज महोत्सव १० गतेसम्म चल्नेछ । नव आदर्श सामुदायिक विकास समाजले आयोजना गरेको यो महोत्सवमा युवाहरुका लागि भलिवल प्रतियोगिताको आयोजना गरिनुकासाथै बालवालिकाहरुका लागि पनि थुप्रै कार्यक्रमको आयोजना गरिएको छ । यस्तै महोत्सवमा लोकदोहोरी प्रतियोगिता र नृत्य प्रतियोगिताको समेत आयोजना गरिएको नव आदर्श सामुदायिक विकास समाजले जनाएको छ ।
