पोखरा । कास्की प्रहरीले पोखराका विभिन्न स्थानबाट ठूलो परिमाणमा अवैध सुन र चाँदीसहित ११ जना भारतीय नागरिकलाई पक्राउ गरेको छ। पक्राउ पर्नेमा भारतको महाराष्ट्र, कलकत्ता र पश्चिम बंगालका नागरिकहरु रहेका छन् ।
जिल्ला प्रहरी कार्यालय कास्कीका अनुसार, पक्राउ परेकाहरुको साथबाट ६ किलो चार सय ग्राम सुन, ४ सय ४४ ग्राम चाँदी र पाँच लाख १४ हजार ६ सय ६५ रुपैयाँ नगद बरामद भएको छ। पक्राउ पर्नेहरुमा राजेन्द्र रामचन्द्र जगताप, उज्वल भोमिक, सुनिता पवार, मनिक लाल आदत, असित वर, तापस सामन्त, सन्दीप ढाप, सोमनाथ पाल, दीपक सामन्त, गोविन्द दिण्डा र प्रोभास माझी रहेका छन् ।
प्रहरीका अनुसार, पक्राउ परेकाहरु लामो समयदेखि पोखरामा सुनचाँदी कालिगढको रुपमा काम गर्दै आएका थिए र उनीहरु अवैध सुन तथा चाँदीको कारोबारमा संलग्न रहेको गोप्य सूचनाको आधारमा पक्राउ गरिएको हो। जिल्ला प्रहरी कार्यालय कास्कीका प्रमुख प्रहरी उपरीक्षक श्यामबाबु ओलियाले पक्राउ परेका सबैलाई बरामद गरिएको सुन, चाँदी र नगदसहित आवश्यक कारबाहीका लागि राजस्व अनुसन्धान कार्यालय, बुटवल पठाइने जानकारी दिनुभएको छ।
