परासी । प्रहरीले पश्चिम नवलपरासीको पाल्हिनन्दनबाट लागूऔषधसहित चार जना युवालाई पक्राउ परेका छन । पक्राउ पर्नेमा पाल्हिनन्दन गाउँपालिका–३ बेलासपुर बस्ने ३० वर्षीय जमालुद्दीन नाउ, २४ वर्षीय विक्रम सहनी, २२ वर्षीय सन्तोष गोसाई र पाल्हिनन्दन–४ लोहरौलीका २५ वर्षीय सोनु पटेल छन् ।
उनीहरूको साथबाट विभिन्न तीन प्रकारका १५० एम्पुल लागूऔषध बरामद भएको जिल्ला प्रहरी कार्यालय परासीका सूचना अधिकारी डीएसपी रेशम बोहराले जनाए । पाल्हिनन्दन गाउँपालिका–४ लोहरौलीमा रहेको एक गेस्ट हाउसको कोठामा कारोबार हुँदै गर्दा प्रहरीले छापा मारेर उनीहरुलाई पक्राउ गरेको हो ।
लागूऔषध खरिद बिक्री तथा ओसारपसार गरिरहेको भन्ने सूचनाका आधारमा प्रहरीले उनीहरू बसेको ठाउँमा छापा मारेको थियो । पक्राउ परेका चारै जनालाई लागूऔषध ओसारपसार कसुरमा जिल्ला अदालतबाट म्याद थप गरेर अनुसन्धान भइरहेको प्रहरीले जनाएको छ ।
