कञ्चन । रुपन्देहीको कञ्चन गाउँपालिकामा गाउँपालिका स्तरीय रनिङ्ग शिल्ड छनौट प्रतियोगिता रुद्रपुर माध्यमिक विद्यालयको खेल मैदानमा शुरु भएको छ । ३० वटा सामुदायिक तथा संस्थागत विद्यालयका करिब १२ सय विद्यार्थीहरु सहभागी रहेको यस प्रतियोगिताको उद्घाटन गाउँपालिका अध्यक्ष नवराज ढकालले गर्नुभएको हो।
उद्घाटनका क्रममा अध्यक्ष ढकालले खेलकुदले विद्यार्थीको शैक्षिक स्तरसँगै शारीरिक, मानसिक र संवेगात्मक विकासमा महत्वपूर्ण भूमिका खेल्ने बताउनुभयो । कार्यक्रममा उपाध्यक्ष मौमी थापा मगर, प्रमुख प्रशासकीय अधिकृत माधवराज पोखरेल र शिक्षा शाखा प्रमुख रमेश भूसाल लगायतका वक्ताहरूले खेलकुदले विद्यार्थीमा हारजितको भावनाभन्दा माथि उठेर अनुशासन, सहकार्य र धैर्यता सिकाउने उल्लेख गर्नुभयो । प्रतियोगितालाई मर्यादित र अनुशासित बनाउन विद्यालय व्यवस्थापन समिति र शिक्षक प्रतिनिधिहरुले समेत ऐक्यबद्धता जनाएका छन् ।
यस प्रतियोगितामार्फत छनौट हुने उत्कृष्ट खेलाडीहरुले जिल्ला, प्रदेश र राष्ट्रिय स्तरसम्म पुगेर कञ्चनको प्रतिष्ठा बढाउने विश्वास लिइएको छ। रुद्रपुर माध्यमिक विद्यालयका शिक्षक जीवन गौतमले सञ्चालन गर्नुभएको उक्त कार्यक्रममा विद्यार्थीहरुमा भएको अन्तरनिहित क्षमता उजागर गर्ने लक्ष्य राखिएको छ।
