भैरहवा । नेकपा एमालेका पूर्वसांसद वासुदेव घिमिरेले पार्टी परित्याग गरेका छन् । रुपन्देही क्षेत्र नं. ५ का पूर्वसांसद तथा तिलोत्तमा नगरपालिकाका पूर्वमेयर घिमिरेले सामाजिक सञ्जाल फेसबुकमार्फत पार्टी छोडेको घोषणा गरेका हुन् । पुराना राजनीतिक दलहरूको मुख्य नेतृत्वले जनताको इच्छा, चाहना र अहिलेको आवश्यकतालाई सम्बोधन गर्न नसकेको भन्दै उनले पार्टीको जिम्मेवारीबाट अलग भएको बताएका छन् ।
घिमिरेले अहिले आम नागरिकको चाहना सुशासन, विकास, समृद्धिका साथै नेतृत्व हस्तान्तरण र पुस्तान्तरण रहेको उल्लेख गरेका छन् । उनले भनेका छन्, ‘देशको आवश्यकता, इतिहासको गति र आम नागरिकको अपेक्षालाई सम्बोधन गर्नु अहिलेको मुख्य कार्यभार हो । तर, पुराना दलहरूको नेतृत्वबाट यो अवस्था नदेखिएकोले आजैदेखि म संलग्न पार्टीको जिम्मेवारीबाट अलग रहेको छु ।’
उनले विगतमा आफूलाई अवसर दिने नेतृत्वलाई धन्यवाद दिँदै आगामी दिनमा पनि सुशासन र समृद्धिको अभियानमा निष्ठाका साथ काम गरिरहने बताएका छन् । पछिल्लो समय काठमाडौँका मेयर बालेन शाहसँग नजिक रहेका घिमिरेको यो निर्णयलाई अर्थपूर्ण रूपमा हेरिएको छ । केही दिनअघि मात्रै बालेन शाह राष्ट्रिय स्वतन्त्र पार्टी (रास्वपा) मा प्रवेश गरेको सन्दर्भमा घिमिरेको यो कदमलाई विशेष चासोका साथ हेरिएको छ ।
