पाल्पा । जिल्ला प्रहरी कार्यालय पाल्पाले दोभान प्रहरी चौकीमा कार्यरत प्रहरी नायव निरीक्षक (सई) रुम बहादुर खत्रीलाई २०८२ साल असार महिनाको ‘उत्कृष्ट प्रहरी’ (Best Police of the Month) घोषणा गरेको छ । नेपाल प्रहरी संगठनले सुम्पेको जिम्मेवारी व्यावसायिक निष्ठा र सांगठनिक नीति बमोजिम कुशलतापूर्वक सम्पन्न गरी सर्वसाधारणमाझ प्रहरीको छवि उच्च राख्न योगदान पुर्याएबापत उनलाई यो सम्मान प्रदान गरिएको हो ।
जिल्ला प्रहरी कार्यालय पाल्पामा आयोजित एक मासिक बैठकका अवसरमा पाल्पाका प्रहरी प्रमुख, प्रहरी उपरीक्षक (एसपी) पवन कुमार भट्टराईले प्रहरी नायव निरीक्षक खत्रीलाई प्रशंसा-पत्र तथा पुरस्कार प्रदान गरे । प्रहरी उपरीक्षक भट्टराईले खत्रीको कार्यसम्पादनको प्रशंसा गर्दै व्यावसायिकता र इमान्दारीपूर्वक आफ्नो कर्तव्य निर्वाह गर्ने प्रहरी कर्मचारीलाई सधैँ प्रोत्साहन गरिने बताए । उत्कृष्ट प्रहरी घोषित भएपछि खत्रीले आफूलाई थप ऊर्जा मिलेको र आगामी दिनमा अझै जिम्मेवार भएर काम गर्ने प्रतिबद्धता व्यक्त गरे ।
