काठमाडौं । भारतीय प्रधानमन्त्री नरेन्द्र मोदीले राष्ट्रिय स्वतन्त्र पार्टी (रास्वपा) का सभापति रवि लामिछाने र सोही पार्टीका वरिष्ठ नेता बालेन्द्र शाह (बालेन) सँग टेलिफोन वार्ता गर्दै निर्वाचनमा प्राप्त सफलताका लागि बधाई ज्ञापन गर्नुभएको छ। प्रधानमन्त्री मोदीले टेलिफोन संवादका साथै सामाजिक सञ्जालमार्फत समेत सन्देश जारी गर्दै नेपालको निर्वाचनमा रास्वपाले हात पारेको सानदार सफलता तथा दुवै नेताहरूको व्यक्तिगत जितका लागि खुसी व्यक्त गर्नुभएको हो।
उहाँले दुवै नेतालाई बधाई दिँदै गठन हुन लागेको आगामी नयाँ सरकारको पूर्ण सफलताका लागि शुभकामना समेत व्यक्त गर्नुभएको छ। बधाई सन्देशका क्रममा प्रधानमन्त्री मोदीले दुई देशबीचको आपसी हित र द्विपक्षीय सम्बन्धलाई थप प्रगाढ बनाउने विषयमा जोड दिनुभएको छ।
उहाँले नेपाल र भारतबीचको आपसी समृद्धि, समग्र प्रगति र जनस्तरको कल्याणका क्षेत्रमा मिलेर काम गर्न तथा सहकार्य गर्न भारत सदैव प्रतिबद्ध रहेको उल्लेख गर्नुभएको छ। दुई छिमेकी मुलुकबीचको ऐतिहासिक तथा सांस्कृतिक सम्बन्धको चर्चा गर्दै प्रधानमन्त्री मोदीले आगामी वर्षहरूमा नेपाल र भारतबीचको सम्बन्धले नयाँ र थप सुदृढ उचाइ लिने कुरामा आफू पूर्ण रूपमा विश्वस्त रहेको स्पष्ट पार्नुभएको छ।
