अर्घाखाँची । अर्घाखाँची जिल्लामा जेनजी आन्दोलनका नाममा सार्वजनिक तथा निजी सम्पत्तिमा तोडफोड र आगजनी गर्नेहरूमाथि कडा कानुनी कारबाही गरिने प्रहरी नायब उपरीक्षक (डिएसपी) चक्रबहादुर मल्लले बताएका छन् । उनले शान्तिपूर्ण आन्दोलनको अधिकारलाई सम्मान गरिने भए पनि अराजक गतिविधि र सम्पत्तिमा क्षति पुर्याउने कार्यलाई कुनै हालतमा सह्य नहुने स्पष्ट पारेका छन् ।
डिएसपी मल्लका अनुसार, "अपराधजन्य गतिविधि र आन्दोलनलाई मिसाएर समाजमा भय उत्पन्न गर्न खोज्नेहरूमाथि प्रहरीले आवश्यक अनुसन्धान गरी कडा कारबाही गर्नेछ।" हालसम्म तोडफोड र आगजनीमा संलग्न केही व्यक्तिहरूको बारेमा अनुसन्धान भइरहेको र अन्यलाई पनि पहिचान गरी कारबाहीको प्रक्रिया अगाडि बढाइएको प्रहरीले जनाएको छ ।
