परासी । नवलपरासीको महेशपुर क्षेत्रका नाकाहरुबाट चोरी तस्करी बढेको छ । महेशपुरको मुख्य नाका क्षेत्र मध्ये अमनीगंज, गोपालपुर–मुडेर, भुजहवा लगायत नवलपरासीको विभिन्न सीमावर्ती नाकाहरु निर्वाध रुपमा अवैध रुपमा विभिन्न साम्रगी भित्रिरहेपनि प्रशासनले चासो नदिएको स्थानीयहरुले गुनासो गरेका छन् ।
राजस्व चुहावट नियन्त्रणका लागि खटिने सशस्त्र प्रहरी र नेपाल प्रहरीले समेत यसरी हुने तस्करीमा चासो नदेखाउँदा करोडौं राजस्व गुमिरहेको सीमा क्षेत्रका बासिन्दाहरुको भनाइ छ । उनीहरुका अनुसार भारतबाट आउने माछालाई चेकजाँच गरेर मात्रै नेपाल भित्रिन दिन व्यवस्था भएपनि सीमानाका भुजहवानाकाबाट निर्वाध रुपमा भित्रिने गरेको छ ।
भारतबाट कपडा, चिनी, हार्डवेयरका सामान, गाडीका पार्टपुर्जा, कुखुरा, खाद्यान्न सामग्रीहरु खुलेयाम तस्करी भइ सदरमुकाम परासी बजारसम्म पुग्ने गरेका छन् । सीमावर्ती सहर ठुठिबारीबाट बिना भन्सारका लाखौं मूल्य बराबरको अवैध समान दिनहुँ भित्रिरहेको स्थानीयको भनाइ छ । त्यस्तै भुजहवा नाकाबाट ब्रोईलर कुखुरा, खाद्यान्न ,चिनी, कपडा, हार्डवेयरका सामान खुलेयाम आउने गरेको छ । भने नेपालबाट गोपालपुर–मुडेर नाका हुँदै कवाडको तस्करी हुने गरेको छ ।
तस्करहरुले रातीको ११ बजेदेखि बिहानको ३ बजेसम्म सामान भित्रयाउने गरेको सीमा क्षेत्रका बासिन्दाको आरोप छ । यसरी सामान भित्राउदा प्रहरीले भने चासो नदिने गरेकाले मिलेमतोको आशंका गरिएको छ । यता नवलपरासी प्रहरीले भने भारतबाट अवैध रुपमा नेपाल भित्रिने सामान बरामद गरी भन्सार कार्यालय पठाउँदै आएको दावी गरेको छ । सीमा क्षेत्रमा हुने तस्करीलाई निरुत्साहित गर्न सामान बरामद गरी भन्सार पठाउने गरिएको र पछिल्लो समय प्राय दैनिकजसो अवैध सामान बरामद गर्दै आएको प्रहरीको भनाइ छ ।
