पाल्पा । जिल्ला प्रहरी कार्यालय पाल्पाले आर्थिक वर्ष २०८२/०८३ को मंसिर महिनामा सम्पादित विभिन्न कार्य तथा उपलब्धिहरूको प्रगति विवरण सार्वजनिक गरेको छ। जिल्ला प्रहरी कार्यालयका सूचना अधिकारी एवं प्रहरी नायव उपरीक्षक होम प्रकाश चौधरीका अनुसार यस महिनामा प्रहरीले अपराध नियन्त्रण, अनुसन्धान र राजस्व संकलनका क्षेत्रमा महत्त्वपूर्ण सफलता प्राप्त गरेको छ।
मंसिर महिनामा मात्रै जिल्लामा कुल २४ वटा नयाँ मुद्दाहरू दर्ता भएका छन्, जसमा बैंकिङ कसूर, सवारी ज्यान र भवितव्य ज्यानका मुद्दाहरू प्रमुख रहेका छन्। प्रहरीले यस अवधिमा ९ वटा मुद्दाको सफल अनुसन्धान सम्पन्न गरी फछ्र्यौट गरेको छ भने विभिन्न अपराधमा संलग्न १२ जना प्रतिवादीलाई पक्राउ गर्न सफल भएको छ। यस्तै, अदालतको फैसला कार्यान्वयनलाई तीव्रता दिँदै ६ जना फरार प्रतिवादीलाई पक्राउ गरी उनीहरूबाट १ लाख ५ सय रुपैयाँ जरिवाना र ५ महिना २८ दिन कैद असुल गरिएको छ।
राजस्व संकलन र अवैध गतिविधि नियन्त्रणमा पनि पाल्पा प्रहरी निकै सक्रिय देखिएको छ। ट्राफिक नियम उल्लंघन, भन्सार छली र प्राकृतिक सम्पदाको अवैध दोहन नियन्त्रणका क्रममा यस महिना ६ लाख रुपैयाँ भन्दा बढी राजस्व संकलन गरिएको छ। यसका साथै प्रहरीले ४०४ लिटर अवैध मदिरा र दुईवटा अवैध हतियार समेत बरामद गरेको छ। घरेलु हिंसाका उजुरीहरूमा मिलापत्र गराउने र हराएका व्यक्तिहरूको खोजी कार्यमा पनि प्रहरीले उल्लेख्य भूमिका निर्वाह गरेको छ।
सामाजिक उत्तरदायित्व र सचेतनाका क्षेत्रमा प्रहरीले ६७ वटा समुदाय-प्रहरी साझेदारी कार्यक्रम र २७ वटा विद्यालय केन्द्रित कार्यक्रम सञ्चालन गरेको छ, जसबाट २ हजार ७ सय नागरिक तथा विद्यार्थीहरू लाभान्वित भएका छन्। पाल्पामा प्रहरी उपरीक्षक दिपेन्द्र पंजियार थारुले नेतृत्व सम्हालेपछि जिल्लाको शान्ति सुरक्षा र कार्यसम्पादन शैली थप प्रभावकारी, योजनाबद्ध र नागरिकमैत्री बनेको महसुस गरिएको छ। उहाँको सक्रिय कमाण्डका कारण प्रहरीको मनोबल उच्च हुनुका साथै अपराध नियन्त्रणमा सकारात्मक परिणामहरू देखिएका छन्।
नागरिक सेवालाई सहज बनाउन कार्यालयले सहायता कक्ष र हटलाइनमार्फत ७१० जनालाई प्रत्यक्ष सेवा प्रवाह गरेको छ। प्रहरी कर्मचारीको कार्यक्षमता र मनोबल बढाउन 'बेस्ट पुलिस अफ द मन्थ' र हाइकिङ जस्ता सिर्जनात्मक कार्यक्रमहरू समेत सञ्चालन भइरहेका छन्। माथागढीमा आयोजित सार्वजनिक सुनुवाई र तानसेनको बोटे समुदाय लक्षित विशेष कार्यक्रमले प्रहरी र नागरिकबीचको सम्बन्धलाई थप प्रगाढ बनाउँदै जिल्लामा सुशासनको जग बलियो बनाउन मद्दत पुर्याएको कार्यालयले जनाएको छ।
