भैरहवा। प्रधानमन्त्री कप पुरुष राष्ट्रिय क्रिकेट प्रतियोगितामा मंगलबार भएको खेलमा बागमतीले गण्डकी प्रदेशलाई ५९ रनले पराजित गरेको छ ।
२८९ रनको लक्ष्य पाएको गण्डकी ४४ ओभरमा आफ्ना सबै विकेट गुमाउदै २१९ रन मात्र बनाउन सक्यो । गण्डकीका लागि सबै भन्दा बढी रन वंश क्षेत्रीले बनाए । उनले ९० बलको सामना गर्दै ४ चौका सहित ५५ रन बनाए । यस्तै समीर कंडेलले २६ रन, अमृत गुरुङ्गले २० रन, दिपक डुम्रे र कमल परियारले १९/१९ रन बनाउनुभयो ।
बलिङमा बागमतीका इशान पाण्डेले ६ ओभरमा २७ रन खर्चिदै ४ विकेट लिए । यस्तै शंकर गजुरेलले २ तथा रिजन ढकाल, गौतम केसी र सुर्य तामाङले समान १/१ विकेट लिए ।
यस अघि भैरहवा स्थित सिद्धार्थ क्रिकेट रङ्गशालामा टस जितेर ब्याटिङ रोजेको बागमतीले निर्धारित ५० ओभरमा ८ विकेटको क्षतिमा २८८ रन बनाएको थियो । बागमतीका लागि ईशान पाण्डे र शुभ कंसाकार र विपिन आचार्यले अर्धशतक प्रहार गरेका थिए । ईशानले ८२ बलमा ६ चौकाको सहयोगमा ६९ रन बनाउदा शुभले भने ५१ बलमा ९ चौका प्रहार गर्दै ५२ रन बनाए । यसैगरि ४२ बल खेल्नुभएका विपिन आचार्य ७ चौका र २ छक्काको सहयोगमा अविजित ६३ रन बनाए । विवेक मगरले ३४ रन, र रिजन ढकालले अविजित २३ बनाए ।
बलिङमा गण्डकीका अर्जुन कुमालले ४ विकेट, विपिन क्षेत्री र सुवास भण्डारीले समान २/२ विकेट लिए ।
प्रतियोगितामा ५ खेल खेलेको गण्डकी १ मा जित र ४ मा हार गरि २ अंक लिएर अंकतालिकामा आठौं स्थानमा रहेको छ भने ५ खेल खेलेको बागमती ३ मा जित र ३ मा हार गरि ४ अंक लिएर अंकतालिकामा छैठौं स्थानमा उक्लेको छ ।
भोलीको खेल भैरहवाको सिद्धार्थ क्रिकेट रङ्गशालामा नेपाल पुलिस र गण्डकी प्रदेश तथा एक्स्ट्राटेक ओभल क्रिकेट रङ्गशालामा सुदूरपश्चिम र लुम्बिनी प्रदेशको बिचमा हुनेछ ।
