भैरहवा । रोहिणी गाउँपालिका अध्यक्ष विद्या प्रसाद यादव चढ्ने स्कोरपियो गाडीमा अज्ञात व्यक्तिले तोडफोड गरेका छन् । अध्यक्ष निवासकै पार्किङ्ग गरि राखिएको अवश्थामा राती करिब ११ बजे गाडी तोडफोड गरिएको इलाका प्रहरी कार्यालय धकधईका प्रमुख प्रहरी निरिक्षक श्याम सुन्दर यादवले बताए ।
लु १ झ ३९५ नम्बरको गाडीमा ढुङ्गा प्रहारबाट अगाडीको शीशा चर्किएको र चालक पट्टिको झ्याल फुटेको प्रहरी निरिक्षक यादवले बताए । गाउँपालिका अध्यक्ष विद्या यादवको भनाई उद्दृत गर्दै उनले भने “राती ११ बजे करिब गाडीबाट आवाज आएको र कुकुरहरु भुकेको हुदा सोही समयमा तोडफोड भएको होला ।”
प्रहरी निरिक्षक यादवले गाउँपालिका अध्यक्ष निवास अगाडी सिसिटिभी क्यामेरा जडान रहेको बताउदै त्यसको फुटेज ल्याएको र अनुसन्धान जारी रहेको जानकारी दिए ।
यता गाउँपालिका अध्यक्ष विद्या प्रसाद यादवले एक प्रेस विज्ञप्ती जारी गर्दै गाडी तोडफोड गर्नेलाई कार्यवाहीको माग गरेको छ । उनले केही असन्तुष्टि भए बसेर छलफल गरि समाधान गर्नुपर्नेमा तोडफोड गर्नु अराजकताको पराकाष्ठा भएको उल्लेख गरेका छन् ।
