काठमाडौं । अख्तियार दुरूपयोग अनुसन्धान आयोगले रौतहटको माधवनारायण नगरपालिकाका तत्कालीन निमित्त प्रमुख प्रशासकीय अधिकृत प्रलब कायस्थ, लेखापाल रामबलम प्रसाद यादव र रौटहट एडभरटाइजिङ एजेन्सीका अध्यक्ष अजित कुमार कर्णविरुद्ध भ्रष्टाचार मुद्दा दायर गरेको छ।
उनीहरूविरुद्ध २ लाख ५७ हजार ९७० रुपैयाँ बिगो माग गरिएको छ। आयोगका प्रवक्ता राजेन्द्र कुमार पौडेलका अनुसार, माधव नारायण नगरपालिका वडा नम्बर ३ मा रहेको देवी माध्यमिक विद्यालय सखुअर्वाको भवन निर्माणमा अनियमितता गरेको आरोपमा उनीहरूविरुद्ध मुद्दा दायर गरिएको हो।
सार्वजनिक खरिद ऐनबमोजिम राष्ट्रियस्तरको दैनिक पत्रिकामा भवन निर्माणका लागि बोलपत्र आह्वानको सूचना र बोलपत्र स्वीकृत गर्ने आशयको सूचना प्रकाशन नगरी आपसी मिलोमतोमा गैरकानुनी लाभ लिएको अख्तियारको ठहर छ।उनीहरूलाई भ्रष्टाचार निवारण ऐन, २०५९ को दफा ८ को उपदफा (१) को देहाय (ङ) बमोजिम कसुरमा कैद र सजायको माग दाबी गरिएको छ।
