पश्चिम नवलपरासी । पश्चिम नवलपरासीको सदरमुकाम परासी बजारस्थित हुलाकी सडक खण्डमा ट्रकको ठक्करबाट एक पत्रकारको मृत्यु भएको छ । जिल्ला प्रहरी कार्यालय पश्चिम नवलपरासीका अनुसार आज दिउँसो रामग्राम नगरपालिका वडा नं. २ सेतो पुल नजिकै पश्चिमबाट पूर्वतर्फ जाँदै गरेको सु.प.प्र. ०१–००१ ख ३४९७ नम्बरको ट्रकले सोही दिशामा जाँदै गरेको लु.प्र.०१–०ङ्ग प ९६१९ नम्बरको मोटरसाइकललाई ठक्कर दिएको हो ।
दुर्घटनामा परि गम्भीर घाइते हुनुभएका मोटरसाइकल चालक रुपन्देहीको तिलोत्तमा नगरपालिका–१३ भलवाडी निवासी अन्दाजी ४०-५० वर्षका पोषकान्त पोख्रेलको उपचारका क्रममा जिल्ला अस्पताल परासीमा निधन भएको प्रहरीले जनाएको छ ।
मृतक पोख्रेल रुपन्देहीका विभिन्न स्थानीय सञ्चार माध्यममा कृयाशील पत्रकार हुनुहुन्थ्यो । घटना शृङ्खलालगत्तै ठक्कर दिने ट्रक र चालकलाई नियन्त्रणमा लिई प्रहरीले थप अनुसन्धान अगाडि बढाइएको जनाएको छ ।
