बुटवल । उच्च अदालत तुलसीपुर, बुटवल इजलासले चालू आर्थिक वर्ष २०८१/८२ मा मुद्दा फछ्र्यौट दरमा उल्लेखनीय वृद्धि गरेको छ । अदालतले यस आर्थिक वर्षमा ८२.०१ प्रतिशत मुद्दा किनारा लगाउँदै ३ हजार २०९ वटा मुद्दा फछ्र्यौट गरेको हो ।
अदालतका निमित्त रजिष्ट्रार हरिगोपाल ज्ञवालीका अनुसार, अघिल्लो आर्थिक वर्षबाट जिम्मेवारी सरेर आएका ८३२ र नयाँ दर्ता भएका ३ हजार ८१ गरी कुल ३ हजार ९१३ मुद्दामध्ये उक्त संख्यामा फछ्र्यौट भएको हो । यो गत वर्षको ७८.७० प्रतिशतको तुलनामा ३.३१ प्रतिशतले बढी हो ।
अदालतका मुख्य न्यायाधीश बासुदेव आचार्यले पछिल्ला वर्षहरूमा मुद्दाको संख्या र फछ्र्यौट दर दुवै बढ्दै गएको बताउनुभयो । अदालतको तथ्यांक अनुसार आर्थिक वर्ष २०७७/७८ मा ४९.८४%, २०७८/७९ मा ५३.०९%, २०७९/८० मा ६०.३७% र २०८०/८१ मा ७८.७०% मुद्दा फछ्र्यौट भएका थिए ।
यसका साथै, चालू आर्थिक वर्षमा मेलमिलापका लागि पठाइएका कुल ३२१ मुद्दामध्ये ६० वटा अर्थात् १९.४८ प्रतिशत सफलतापूर्वक टुङ्गिएका छन् । उच्च अदालत तुलसीपुर, बुटवल इजलास अन्तर्गतका जिल्ला अदालतहरूले पनि मुद्दा फछ्र्यौटमा प्रगति गरेका छन् । जसअनुसार अर्घाखाँचीमा ८७.७९%, पाल्पामा ७४.०९%, गुल्मीमा ७२.१७%, नवलपरासीमा ६८.३८%, कपिलवस्तुमा ६४.९९% र रुपन्देहीमा ६३.४९% मुद्दा फछ्र्यौट भएका छन् ।
