काठमाडौँ । श्रम संस्कृति पार्टीका अध्यक्ष हर्कराज राईले आफ्नो पार्टीमा भ्रष्टाचारीलाई कुनै स्थान नभएको स्पष्ट पार्नुभएको छ । सो पार्टीद्वारा आज काठमाडौँको सिफलमा आयोजित कार्यक्रमलाई सम्बोधन गर्दै उहाँले भ्रष्टाचारीलाई आफूले कुनै हालतमा पनि नछाड्ने उद्घोष गर्नुभयो ।
“एक पैसा भ्रष्टाचार हुँदैन, मौकामा चौका हानौँ भनेर तपाईहरु आउनुभएको छभने गइहाल्नुस्, म कसैलाई छाड्ने छैन”, अध्यक्ष राईले भन्नुभयो, “मैले एक पैसा मात्रै भ्रष्टाचार गरेछु भने सोही दिन मेरो अन्तिम दिन हुनेछ ।” स्रोतबिना पनि आमनागरिकलाई परिचालन गरेरै मुलुक समृद्ध बनाउने योजना आफूसँग भएको जिकिर गर्दै उहाँले आसन्न निर्वाचनमा आफ्नो दललाई मत दिएर सहयोग गर्न आग्रह गर्नुभयो ।
