भैरहवा । लुम्बिनी प्रदेश प्रहरी कार्यालयका प्रमुख प्रहरी नायव महानिरीक्षक (डीआईजी) भूपेन्द्र बहादुर खत्रीले रुपन्देहीका विभिन्न सीमावर्ती प्रहरी इकाइहरूको स्थलगत निरीक्षण तथा अनुगमन गर्नुभएको छ। निरीक्षणका क्रममा उहाँले इलाका प्रहरी कार्यालय मझगावाँसहित प्रहरी चौकी बगौली, पाण्डे पिप्रहवा, मुडिला करौता र रोईनिहवाको अवस्थाबारे जानकारी लिनुभएको हो।
सो अवसरमा डीआईजी खत्रीले सीमा सुरक्षालाई थप सुदृढ बनाउन, अपराध न्यूनीकरण गर्न र खुला नाकाको प्रभावकारी व्यवस्थापनका लागि मातहतका प्रहरीलाई विशेष निर्देशन दिनुभयो। उहाँले नागरिकमैत्री प्रहरी सेवा प्रवाहमा जोड दिँदै विपद् व्यवस्थापन र ट्राफिक सुरक्षा सामग्रीको उचित प्रयोग गर्न समेत आग्रह गर्नुभयो।
साथै, प्रहरी कर्मचारीहरूलाई उच्च अनुशासनमा रहन, ड्युटी व्यवस्थापन चुस्त राख्न र कार्यालयको भौतिक संरचनाको मर्मत-सम्भारमा ध्यान दिन उहाँको निर्देशन थियो। निरीक्षणकै क्रममा डीआईजी खत्रीले नेपाल-भारत सीमा क्षेत्रको समेत अवलोकन गर्नुभएको थियो। सो क्रममा उहाँले भारतीय सीमा सुरक्षा बल (एसएसबी) का अधिकारीहरूसँग भेटघाट गरी सीमा सुरक्षा र आपसी समन्वयका विषयमा छलफल गर्नुभएको लुम्बिनी प्रदेश प्रहरी कार्यालयले जनाएको छ।
