भैरहवा । भारतबाट अवैध रुपमा तस्करी गरेर ल्याइएका कपडा बरामद भएको छ। रुपन्देहीको सियारी गाउँपालिकाको धम्सर क्षेत्रमा डम्प गरिएको कपडा सिमेन्ट लोड रहेको ना ६ ख ७६०५ नम्बरको ट्रकमा लुकाएर लैजादै गरेको अवस्थामा बरामद गरिएको रुपन्देहीका प्रमुख जिल्ला अधिकारी गणेश अर्यालले जानकारी दिए।
तस्करीका कपडा बरामदगीका लागि सीडिओ अर्याल आफै खटिएका थिए।बरामद कपडा राधेश्याम उर्फ तौलन समूहको रहेको बताइएको छ। तौलन समूहले विगत देखि नै मोटरसाइकलमा कपडाको तस्करी गर्दै आएको छ।
‘तस्करी गरेर डम्प गरिएको कपडा अन्यत्र लगिदैछ भन्ने सूचना प्राप्त भएको थियो’, सीडिओ अर्यालले भने, ‘सूचना अनुसार स्थानमा पुग्दा सिमेन्ट लोड रहेको ट्रकमा १२ गाँठ कपडा लुकाएर लैजादै गर्दा बरामद गर्यौँ। हामीलाई देखेपछि साँचो ट्रकमै छाडेर चालक फरार भए।’उनका अनुसार नियन्त्रणमा लिइएको ट्रक,सिमेन्ट र कपडा ५३ लाख रुपैयाँ बराबरको रहेको छ।
कपडा र सिमेन्टसहित नियन्त्रणमा लिइएको ट्रक आवश्यक कारवाहीका लागि भैरहवा भन्सार कार्यालयमा बुझाइएको छ। खुल्ला सीमाको फाइदा उठाउँदै तस्करहरुले तस्करी गरेपनि नेपाल प्रहरी, सशस्त्र प्रहरीसहित रुपन्देही प्रशासन तस्करी नियन्त्रणमा लागेको छ।
