भैरहवा । सिद्धार्थनगर नगरपालिका वडा नम्बर ७ को आयोजनामा सम्पन्न दोश्रो वडाकपको उपाधि भैरहवा क्रिकेट क्लबले जितेको छ । शनिबार गोनहिया क्रिकेट मैदानमा सम्पन्न फाईनल खेलमा भैरहवा गाउँ क्रिकेट क्लबलाई पराजित गर्दै भैरहवा क्रिकेट क्लबले उपाधि जितेको हो ।
भैरहवा क्रिकेट क्लबले हिमाली क्रिकेट क्लबलाई र भैरहवागाउँ क्रिकेट क्लबले रामजानकी क्रिकेट क्लबलाई हराउदै फाईनलमा पुगेका थिए । वडा नम्बर ७ अन्र्तगतको ४ टिम सहभागी रहेको प्रतियोगिताको विजेताले नगद १० हजार रुपैया र उप विजेताले ८ हजार रुपैया प्राप्त गरेको खेलकुद संयोजक प्रविणजंग राणाले जानकारी दिए ।
यस अघि कार्यक्रमको उदघाटन गर्दै सिद्धार्थनगर नगरपालिकाका प्रमुख ईस्तियाक अहमद खाँनले खेलकुदको माध्यमबाट राष्ट्रलाई नै पहिचान दिलाउन सकिने र यसमा पनि क्रिकेटको अहिले अझै क्रेज रहेको कारण खेलाडीहरुलाई यसलाई गम्भिरता पूर्वक लिन आग्रह गरे । उनले अहिले क्रिकेट व्यवसायीक भएको र यसबाट पनि मनग्य आम्दानी गर्न सकिने हुदा युवाहरु यसतर्फ बिशेष ध्यान दिन आवश्यक रहेको बताए । नगरपालिका स्तरमै खेलाडीहरुको छनौट गरि राष्ट्रिय स्तरका क्रिकेट खेलाडी उत्पादन गर्ने लक्ष्य सहित वडा कप हुदै मेयर कपको आयोजना हुने गरेको उनले बताए ।
सिद्धार्थनगर नगरपालिका वडा नम्बर ७ का वडा अध्यक्ष दामोदर शर्मा भण्डारीको अध्यक्षता, नगरपालिका प्रमुख ईस्तियाक अहमद खाँनको प्रमुख आतिथ्यतामा सम्पन्न कार्यक्रममा वडा नम्बर ४ का वडा अध्यक्ष मुक्तिनाथ यादव (भोला), वडा नम्बर ८ का वडा अध्यक्ष राजनजंग राण, वडा नम्बर ५ का वडा अध्यक्ष पुरन श्रेष्ठ, वडा नम्बर १० का वडा अध्यक्ष सुर्जमन यादव, वडा नम्बर २ का वडा अध्यक्ष छेदीलाल श्रीवास्तव, वडा नम्बर ७ का पूर्व वडा अध्यक्ष भिमसेन कर्माचार्य, टोल सुधार समितिका अध्यक्ष ठाकुर कुमार अधिकारी, वडा सदस्य अर्पिता विश्वकर्मा लगायतको उपस्थिति रहेको थियो । कार्यक्रम वडा सदस्य अभिषेक रावलको सञ्चालन र शुषमा प्रधानको स्वागतमा सम्पन्न भएको थियो ।
