भैरहवा । जिल्ला प्रहरी कार्यालय, रुपन्देहीले जिल्लाका विभिन्न स्थानबाट करिब २५ लाख रुपैयाँ बराबरको अवैध सामान बरामद गरेको छ । तस्करी नियन्त्रण अभियान अन्तर्गत प्रहरीले अवैध रूपमा ढुवानी गरिएका भैंसी, पाडापाडी, युरिया मल, कपडा लगायतका सामानसहित सवारी साधन नियन्त्रणमा लिएको हो ।
प्रहरीका अनुसार रोहिणी गाउँपालिकाबाट बिलबिजक नभएका १० वटा भैंसी, पाडापाडी र दुईवटा बलेरो पिकअप गाडीसहित २१ लाख ३० हजार बराबरको सामान नियन्त्रणमा लिइएको छ । त्यसैगरी, कोटहीमाई, मर्चवार, भैरहवा लगायतका क्षेत्रबाट युरिया मल, बोइलर कुखुरा, रेडबुल र कपडा जस्ता अवैध सामान पनि बरामद गरिएको छ ।
यस क्रममा प्रहरीले तस्करीमा संलग्न रहेको आरोपमा सिद्धार्थनगरका प्रदीपकुमार धरिकार र अनिश धरिकारलाई नियन्त्रणमा लिएको छ । बरामद गरिएका सामान र पक्राउ परेका व्यक्तिहरूलाई आवश्यक कारबाहीका लागि भैरहवा भन्सार कार्यालय र पशु क्वारेन्टाइनमा बुझाइएको जिल्ला प्रहरी कार्यालय, रुपन्देहीले जानकारी दिएको छ ।
