भैरहवा । कृषि तथा पशु विकास मन्त्री रामनाथ अधिकारीले नेपालमा रासायनिक मल उद्योग सञ्चालन गर्ने राज्यको प्रण हुनुपर्ने बताउनुभएको छ । उहाँले यसका लागि आफू मन्त्री बनेदेखि नै मन्त्रिपरिषद्मा कुरा राख्दै आएको जानकारी दिनुभयो । नेपाली काँग्रेस क्षेत्रीय कार्यसमिति क्षेत्र नम्बर ३, रुपन्देहीले आयोजना गरेको भेटघाट तथा अन्तरक्रिया कार्यक्रममा बोल्दै मन्त्री अधिकारीले लगानी बोर्डले मल कारखाना स्थापनाको सम्भाव्यता अध्ययन गरिरहेको र दुई महिनाभित्र निर्णय आउने विश्वास व्यक्त गर्नुभयो ।
उहाँले मल व्यवस्थापनमा आफू चिन्तित रहेको बताउँदै गत वर्ष २७ अर्ब छुट्याइएकोमा यस वर्ष मलखादका लागि करिब २९ अर्ब बजेट विनियोजन गरिएको जानकारी दिनुभयो । नेपालमा १३ लाख टन मलको आवश्यकता भए पनि हाल साढे ४ लाख टन मात्र आपूर्ति भइरहेकोमा यसलाई बढाएर ८ लाख टन पुर्याउने लक्ष्य रहेको उहाँले उल्लेख गर्नुभयो । देशभरका किसानको मल अभावको गुनासोप्रति आफू गम्भीर रहेको र समस्याबाट नभाग्ने प्रतिबद्धता व्यक्त गर्नुभयो । किसानको छोरा भएकाले किसानका समस्याबारे आफू जानकार रहेको पनि उहाँले बताउनुभयो । उहाँले उखु किसानहरूलाई आन्दोलन नगर्न आग्रह गर्नुभयो ।
कार्यक्रममा मन्त्री अधिकारीले रुपन्देही क्षेत्र नम्बर ३ मा हुन लागेको उपनिर्वाचनमा नेपाली काँग्रेसले जित्नुपर्नेमा जोड दिनुभयो । काँग्रेस क्षेत्र नम्बर ३ का सभापति सुशील गुरुङको सभापतित्वमा भएको कार्यक्रममा काँग्रेस केन्द्रीय सदस्य डा. गोविन्द पोखरेल, जिल्ला समन्वय समिति रुपन्देहीका प्रमुख उमाकान्त चपाईं लगायतले बोल्नुभएको थियो ।
