कञ्चन । रुपन्देहीको कञ्चन गाउँपालिका–५ स्थित पिपरीचापा खेलमैदानमा यही मंसिर २८ गतेदेखि ‘प्रथम पिपरीचापा महोत्सव तथा विविध सांस्कृतिक कार्यक्रम’ आयोजना हुने भएको छ । ‘कला र संस्कृतिको जगेर्ना, युवाहरूको एकता’ भन्ने मूल नाराका साथ गौतमबुद्ध सामुदायिक विकास केन्द्रले उक्त महोत्सवको आयोजना गर्न लागेको हो ।
महोत्सवमा प्रकाश सपुत, बद्री पंगेनी, पशुपति शर्मा, ज्योति मगर, खेम सेञ्चुरी, अर्जुन सापकोटा, प्रकाश दुतराज, अस्मिता डल्लाकोटी, एलिना चौहान, पुस्कल शर्मा लगायतका चर्चित राष्ट्रिय तथा स्थानीय कलाकारहरूको विशेष सांगीतिक प्रस्तुति रहने आयोजकले जनाएको छ ।
पत्रकार सम्मेलनमा बोल्दै केन्द्रका अध्यक्ष कमल परियारले विगतमा खेलकुद र सामाजिक कार्य सफलतापूर्वक सम्पन्न गरेको अनुभवका आधारमा यो सांस्कृतिक महोत्सव पनि भव्य रूपमा सफल हुने विश्वास व्यक्त गर्नुभयो। उहाँले महोत्सवलाई सफल बनाउन स्थानीय आमा समूह, क्लब र टोल विकास संस्थाहरूको पूर्ण सहयोग रहेको बताउनुभयो । सुपा देउराली माई कम्पनीको व्यवस्थापन र सञ्चारकर्मी दिनेश घिमिरेको संयोजनमा हुन लागेको यो महोत्सव आगामी पुस १४ गतेसम्म सञ्चालन हुनेछ। महोत्सव अवलोकनका लागि १०० रुपैयाँ टिकट शुल्क निर्धारण गरिएको छ।
