लुम्बिनी । लुम्बिनी प्रेस क्लबको ११ औं स्थापना दिवस तथा तेस्रो लुम्बिनी न्यूज फेस्टिभलको समापन समारोहमा बोल्दै लुम्बिनी सांस्कृतिक नगरपालिकाकी कार्यवाहक नगर प्रमुख कल्पना हरिजनले विश्व शान्तिको मुहान लुम्बिनीबाट शान्तिको सन्देश प्रवाह गर्नुपर्नेमा जोड दिनुभएको छ। उहाँले बुद्ध जन्मस्थलबाट फैलिने शान्तिको सन्देशले मात्र मानव मस्तिष्क र व्यवहारमा सकारात्मक परिवर्तन ल्याउन सक्ने बताउनुभयो।
विकास र समृद्धिका लागि बुद्धका पञ्चशील र अष्टशीलको पालना अपरिहार्य रहेको औंल्याउँदै उहाँले थाइल्यान्ड, बर्मा र जापानजस्ता बुद्धमार्गी राष्ट्रहरूको प्रगतिबाट पाठ सिक्नुपर्ने धारणा राख्नुभयो। राष्ट्र प्रमुखदेखि सर्वसाधारणसम्मले बुद्धका उपदेश आत्मसात गरे मुलुकले चौतर्फी विकासको गति लिने विश्वास व्यक्त गर्दै उहाँले सञ्चार क्षेत्रलाई पनि शान्ति र विकासका यस्तै सकारात्मक पक्षहरू उजागर गर्न आग्रह गर्नुभयो।
