काठमाडौं । राष्ट्रिय प्रजातन्त्र पार्टी (राप्रपा)ले प्रधानमन्त्री पुष्पकमल दाहाल ‘प्रचण्ड’लाई मागपत्र बुझाउने भएको छ । राष्ट्रियता, विकास, सुशासन, सेवा प्रवाह लगायत जनजीविकासँग सम्बन्धित विभिन्न विषय उल्लिखित मागपत्र फागुन ९ गते बुझाउने निर्णय गरेको हो ।
केन्द्रीय कार्यालयमा धुम्बाराहीमा बुधबार बसेको पार्टीका विभिन्न समितिका संयोजकहरुको बैठकले उक्त निर्णय गरेको राप्रपाले जनाएको हो ।
आन्दोलन मूल समितिका संयोजक राजेन्द्र लिङ्देन र निर्देशन समितिका अध्यक्ष डा.प्रकाशचन्द्र लोहनीको उपस्थितिमा आन्दोलन परिचालन समितिका संयोजक डा.धवल शमशेर राणाको अध्यक्षतामा बसेको परिचालन समिति, पार्टी पदाधिकारी, केन्द्रीय सदस्यहरु, उपत्यकाका जिल्ला अध्यक्षहरु, भ्रातृ संगठनका प्रमुख लगायतको बैठकले उक्त दिन मागपत्र बुझाउने निर्णय गरेको जनाइएको छ ।
उक्त दिन राप्रपाले काठमाडौंमा प्रदर्शनसमेत गर्ने भएको छ । सोही दिन पार्टीले देशका ७४ जिल्लामा प्रदर्शनसहित प्रमुख जिल्ला अधिकारीमार्फत सरकारलाई मागपत्र पेस गर्ने कार्यक्रम समेत तय भएको छ ।
