वीरगञ्ज । चालु आर्थिक वर्षको पहिलो पाँच महिनामा वीरगञ्ज नाका हुँदै हुने निर्यात व्यापारमा ठूलो उछाल आएको छ। तथ्यांक अनुसार यो अवधिमा ३९ अर्ब ९७ करोड रुपैयाँ बराबरका वस्तु तथा सामान विदेशी मुलुकमा निर्यात भएका छन्। यो रकम गत आर्थिक वर्षको सोही अवधिको तुलनामा १८ अर्ब ७९ करोड अर्थात् ८९ प्रतिशतले बढी हो। गत वर्षको पाँच महिनामा २१ अर्ब १८ करोडको मात्र निर्यात भएको थियो।
वीरगञ्ज भन्सार कार्यालयका सूचना अधिकृत उदयसिंह विष्टका अनुसार यस अवधिमा सबैभन्दा धेरै २० अर्ब ७६ करोड रुपैयाँ बराबरको प्रशोधित भटमासको तेल निर्यात भएको छ। यसैगरी, ३ अर्ब ७ करोडको फलफूलको जुस, २ अर्ब ८७ करोडको प्रशोधित सूर्यमुखी तेल, १ अर्ब ९७ करोडको प्रशोधित पाम तेल र १ अर्ब ५० करोड रुपैयाँ बराबरका विभिन्न कपडाहरु पनि भारत तथा तेस्रो मुलुकतर्फ निर्यात भएको कार्यालयले जनाएको छ।
