भैरहवा । जनता समाजवादी पार्टी (जसपा), नेपालका अध्यक्ष उपेन्द्र यादवले देशमा निर्वाचनको विकल्प नरहेको बताउनुभएको छ । भैरहवामा आयोजित पार्टीको लुम्बिनी प्रदेश समितिको प्रथम अधिवेशनमा बोल्दै अध्यक्ष यादवले निर्वाचनका लागि सरकारले उचित वातावरण बनाउनुपर्नेमा जोड दिनुभयो ।
अध्यक्ष यादवले हाल देशमा सुरक्षाको वातावरणलाई लिएर धेरैको चिन्ता र चासो रहेको भन्दै सरकारले यसलाई सम्बोधन गर्नुपर्ने आवश्यकता औँल्याउनुभयो। उहाँले भन्नुभयो, “यो सरकारको दायित्व नै निर्वाचन गराउने हो। जनतालाई सुरक्षा दिने प्रहरी प्रशासन भयभीत रहेको अवस्थामा यसको अन्त्य गरेर निर्वाचनको वातावरण बनाउनुपर्छ र निर्वाचन हुनुपर्छ।”
पूर्वउपप्रधानमन्त्री यादवले लोकतन्त्रमा जनताको प्रतिनिधि सरकारमा हुनुपर्ने र जनसङ्ख्याको आधारमा प्रतिनिधित्व आवश्यक रहेकोमा जोड दिनुभयो। उहाँले पार्टी र उम्मेदवारले पैसा खर्च गर्न नपर्ने गरी निर्वाचन प्रणालीमा सुधार हुनुपर्ने तथा सङ्घीय संरचना सुधार्न प्रदेश सरकारलाई अधिकारसम्पन्न बनाइनुपर्ने धारणा राख्नुभयो। पार्टीका महासचिव रामकुमार शर्माले उत्पीडित समुदायले पाएका अधिकार सुरक्षित गरी संविधान संशोधनमार्फत देशलाई अग्रगमनतर्फ लैजानुपर्नेमा जोड दिनुभयो।
