भैरहवा । रुपन्देहीमा सुरु भएको प्रधानमन्त्री कप पुरुष राष्ट्रिय क्रिकेट प्रतियोगितामा शसस्त्र प्रहरीले पहिलो जित निकालेको छ । रुपन्देहीको एक्स्ट्राटेक ओभल क्रिकेट रङ्गशालामा भएको खेलमा शसस्त्र प्रहरीले बाग्मती प्रदेशलाई १ सय रन अन्तरले पराजित गरेको छ ।
१७५ रनको सामान्य लक्ष्य पाएको बाग्मती प्रदेशलाई निर्धारित ५० ओभरमध्ये २८ दशमलव २ ओभरमा ७४ रनमै अलआउट गर्दै शसस्त्रले जित निकालेको हो । बाग्मती प्रदेशका लागि शुभ कंसाकारले मात्र दोहोरा अंकमा रन बनाउन सके । उनले २४ बलको सामना गरि २ चौकाको सहयोगमा १६ रन बनाउदा अन्य कुनै पनि ब्याट्सम्यानले दोहोरो अंक बनाउन सकेनन ।
बलिङ्गमा शसस्त्रका कमल ऐरीले ४ विकेट लिए । यसै गरि कप्तान रोहित पौडेल र अमर रौटेलाले समान २/२ विकेट हासिल गरे ।
यस अघि टस जितेर पहिला ब्याटिङ्ग गरेको शसस्त्र प्रहरीले शसस्त्र प्रहरी १ सय ७४ रन बनाएको थियो । शसस्त्रका लागि सन्दिप जोराले सर्वाधिक ३७ रन बनाए । यस क्रममा उनले ६२ बलको सामना गरि २ चौका मात्र प्रहार गरे । अमर रौटेलाले २६ रन र दिपक बोहराले २५ रनको व्यक्तिगत योगदान गरे ।
बाग्मतीका राजन ढकालले ५ विकेट महत्वपूर्ण लिए पनि टिमलाई जित दिलाउन सकेनन । ८ ओभर फालेका राजनले २ मेडेन राख्दै ३० रन खर्चिए । यसै गरि नन्दन यादवले ३ र सूर्य तामाङ्गले २ विकेट लिए ।
खेलको म्यान अफ द म्याच शसस्त्रका कमल ऐरी घोषित भए ।
एक्स्ट्राटेक ओभल मैदानमा सोमबारको खेल लुम्बिनी प्रदेश र बिभागीय टोली नेपाल प्रहरी बिच हुनेछ ।
