अर्घाखाँची । सन्धिखर्क नगरपालिका वडा नं ७ का अध्यक्ष चुरा ब. केसीले स्वर्गीय रामलाल पुरीका अधुरा सपनाहरूलाई साकार पार्न सबैले हातेमालो गर्नुपर्ने बताउनुभएको छ । आजदेखि सुरु भएको प्रथम स्व. रामलाल पुरी स्मृति भलिबल प्रतियोगिताको उद्घाटन गर्दै अध्यक्ष केसीले पुरी एक मेहनती, सकारात्मक सोचका धनी, जुझारु, निष्ठावान् र समाजप्रति समर्पित व्यक्ति रहेको स्मरण गर्नुभयो ।
अध्यक्ष केसीले पुरी भौतिक रूपमा हामी माझ नभए पनि उहाँका सपनाहरूलाई साकार पार्न आफू निरन्तर लागिपर्ने प्रतिबद्धता व्यक्त गर्नुभयो । उहाँले पुरीको सपनालाई साकार पार्न सबैलाई निरन्तर सत्कर्म र प्रेरणाको बाटोमा लाग्न आह्वान गर्नुभयो ।
कार्यक्रममा स्वर्गीय पुरीका बुवा हुमलाल पुरी लगायतले मन्तव्य राख्नुभएको थियो । कार्यक्रममा पूर्व वडा अध्यक्ष प्रितम बहादुर थापा लगायत समाजसेवी, शिक्षाप्रेमी, बुद्धिजीवी, खेलप्रेमी, शुभेच्छुक र स्थानीय बासिन्दाको उल्लेख्य उपस्थिति रहेको थियो ।
खाँचीकोट सेवा समाजको आयोजना तथा बागमारा सामुदायिक क्लबको सहजीकरणमा सम्पन्न भएको यस कार्यक्रम नारायण पुरीको अध्यक्षतामा भएको थियो । प्रकाश थापाले कार्यक्रम सञ्चालन गर्नुभएको थियो भने कमल केसीले स्वागत मन्तव्य दिनुभएको थियो। प्रतियोगितामा उल्लेख्य संख्यामा प्रतिस्पर्धीहरूको सहभागिता रहेको छ। २०८२ सालमा ट्रिपर दुर्घटनामा परी २७ वर्षको उमेरमा निधन हुनुभएका स्वर्गीय पुरीकी श्रीमती र एक छोरी हुनुहुन्छ ।
