काठमाडौं । बागमती प्रदेशका मुख्य मन्त्री बहादुर सिंह लामाले ल्होसार पर्वको मौलिक प्रकृति र मनाउने प्रक्रिया हेर्दा एक दिन सरकारी बिदा पर्याप्त नरहेको बताएका छन् । बिहीबार सोनाम ल्होसारको अवसरमा काठमाडौंको टुँडीखेलमा आयोजित कार्यक्रममा बोल्दै उनले ल्होसार टुँडीखेलमा महोत्सव गरेर मनाईँने पर्व मात्र नभएको भन्दै ल्होसार हरेक तामाङ समुदायले घर –घरमा विधि अनुसार मनाउनु पर्ने बताए ।
उनले भने, ‘ल्होसार पर्वको मौलिक प्रकृति र मनाउने प्रकृया हेर्दा आज जे गरिरहेका छौं सहि नै भयो भन्ने मलाई लाग्दैन् । ल्होसार मनाउने सबै प्रकृया पूरा गर्नको लागि एक दिन सरकारी बिदा पर्याप्त छैन् । ल्होसार टुँडीखेलमा महोत्सव गरेर मनाईँने पर्व मात्र पनि होईन् । जबसम्म प्रत्येक तामाङ समुदायको घर –घरमा विधि अनुसार माईँदैन् तबसम्म साँचो अर्थमा तामाङ जातिको संस्कृति पहिचानको जगेर्ना हुँदैन् ।’
त्यस्तै उनले अहिले तामाङ समुदाय संस्कृति पुनजागरणको चरणबाट गुज्रिरहेको बताए । एक जाति एक भाषा एक भेषाको सरकारी नीतिको कारण मौलिक संस्कार र संस्कृति लोप भएको भन्दै उक्त संस्कार र संस्कृतिको खोज अन्वेषण र अवलम्बन गर्ने कार्य भइरहेको उनले जानकारी दिए ।
उनले भने, ‘यतिबेला तामाङ समुदाय संस्कृति पुनजागरणको चरणमा गुज्रिरहेको छ । हिजो एक जाति एक भाषा एक भेषाको सरकारी नीतिको कारण हाम्रा मौलिक संस्कार र संस्कृति लोप हुन पुगे । यसरी लोप भएको संस्कार र संस्कृतिको खोज अन्वेषण र अवलम्बन गर्ने कार्य गरेका छौं ।’
मुख्यमन्त्री लामाले ल्होसारलाई सार्वजनिक महत्व र कार्यक्रम भन्दा पनि घरभित्रको पर्वको रुपमा स्थापित गर्नुपर्ने बताए । विश्वव्यापीकरण र आधुनिकीकरणले नेपालको संस्कृतिमाथि प्रहार भइहरको बताउँदै उनले ल्होसार लगायत मौलिक संस्कार संस्कृतिको जगेर्ना गर्न सरकार र नागरिक स्तरबाट ऐकेबद्धताको प्रयास गर्न आवश्यक रहेको बताए ।
