भैरहवा । नेपाल र भारतको क्रिकेट टिम सहभागी ईण्डो–नेपाल क्रिकेट प्रतियोगिता शनिबारबाट लुम्बिनीमा सुरु भएको छ । शनिबार भएको उदघाटन खेलमा ग्राण्ड कस्मोले गनवरिया क्रिकेट क्लबलाई ९९ रनले पराजित गरेको छ ।
टस हारेर ब्याटिङको निम्तो पाएको ग्राण्ड कस्मोले निर्धारित १५ ओभरको खेलमा ५ विकेटको क्षतिमा १९३ रनको बिशाल योगफल तयार गरेको थियो । ग्राण्ड कस्मोको लागि अमृत पाठकले २९ बलमा ३ छक्का र १ चौकाको मद्दतमा सर्वाधिक ६० रन बनाए । यस्तै रुपेश चौधरीले ४१ रन र दिप सिंहले २६ रन बनाए ।
बलिङमा गनवरियाका सन्तोष र दिपजलले समान २÷२ विकेट लिए ।
१९४ रनको लक्ष्य सहित मैदान छिरेको गनवरिया क्रिकेट क्लब १२ दशमलव २ ओभरमा आफ्नो सबै विकेट गुमाउदै ९४ रन मात्र बनाउन सक्यो । उसका लागि जितुले सर्वाधिक ४४ रन र कासीमले १६ रन बनाउनु बाहेक अन्य ब्याटरले दोहोरो अंक समेत जोड्न सकेनन् ।
ग्राण्ड कस्मोका बलर बैतुल्लाह खाँनको घातक बलिङको अगाडी गनवरिया टिम नतमस्तक भएको थियो । बैतुल्लाहले ३ ओभरमा १ मेडेन सहित मात्र १५ रन खर्चिदै ३ विकेट लिए । यस्तै रुपेश चौधरी, गोविन्द चौधरी र सकील खाँनले समान २÷२ विकेट बाडे । ४१ रन बनाउदै २ विकेट समेत लिएका ग्राण्ड कस्मोका रुपेश चौधरी म्यान अफ द म्याच घोषित भए ।
यस अघि भएको उदघाटन कार्यक्रममा लुम्बिनी प्रदेशका सामाजिक विकास मन्त्री चन्द्रकेश गुप्ताले लुम्बिनी प्रदेशमा विकास संगै खेलकुद विकासलाइ पनि प्राथमिकता दिएको बताए । युवाहरुलाइ कुलतबाट जोगाउन र उनिहरुको समग्र विकासमा खेलले महत्वपूर्ण भूमिका खेल्ने हुदा यस्ता कार्यक्रमहरुलाई निरन्तरता दिईने उनले बताए ।
शनिबारबाट सुरु भएको प्रतियोगितामा भारतका १६ टिम र नेपालका १६ टिम गरि ३२ वटा टिमको सहभागीता रहेको लुम्बिनी नवयुवा क्लबका अध्यक्ष अहमद हुसेनले बताए ।
प्रतियोगितामा भारतको गोरखपुर, बनारस, सिद्धार्थनगर लगायतका जिल्लाबाट टिमहरु दर्ता भएका छन् । यस्तै नेपालको सिरहा, नेपालगञ्ज, कपिलवस्तु लगायतबाट टिमको सहभागीता रहेको छ ।
टेनिस बलले नकआउट आधारमा खेलाइने यो प्रतियोगिता यस क्षेत्रकै लोकप्रिय प्रतियोगिता मध्ये पर्दछ । पहिलो पुरस्कार २ लाख रुपैया तथा दोश्रो पुरस्कार १ लाख रुपैया रहेको छ ।
