भैरहवा । सिद्धार्थनगर नगरपालिका–९ स्थित भानु माध्यमिक विद्यालयको स्वर्ण महोत्सव–२०८२ को अवसरमा पूर्व विद्यार्थीहरुले विद्यालय परिसरमा ‘स्वर्णजयन्ती स्मारक’ निर्माण गरी हस्तान्तरण गरेका छन् । विशेषतः एसएलसी २०५६ ब्याचका विद्यार्थीहरुको सक्रिय पहल र आर्थिक सहयोगमा उक्त स्मारक निर्माण गरिएको हो ।
विद्यालय स्थापना भएको ५० वर्ष पूरा भएको ऐतिहासिक अवसरमा पूर्व विद्यार्थीहरुले आफ्नो शैक्षिक जरोप्रति कृतज्ञता प्रकट गर्दै स्थायी सम्झनाका रूपमा स्मारक निर्माण गरेको पूर्व विद्यार्थी हरि बहादुर पाण्डेले बताए । विद्यालय परिसरको प्रमुख स्थानमा आकर्षक ढंगले निर्माण गरिएको उक्त स्मारकमा विद्यालय स्थापना मिति (वि.सं. २०३३ फागुन ९) देखि स्वर्ण महोत्सव वर्ष (२०८२) सम्मको यात्रा अंकित गरिएको छ ।
एसएलसी २०५६ ब्याचका प्रतिनिधिहरूले स्वर्ण महोत्सव समारोहका बीच विद्यालय व्यवस्थापन समितिका पदाधिकारी तथा प्रधानाध्यापक मोतीलाल सुवेदीलाई स्मारक औपचारिक रूपमा हस्तान्तरण गरेका थिए । सो अवसरमा बोल्दै ब्याचका प्रतिनिधि पाण्डेले विद्यालयले दिएको शिक्षा, अनुशासन र संस्कारकै कारण आफूहरु जीवनका विभिन्न क्षेत्रमा स्थापित हुन सफल भएको उल्लेख गर्दै विद्यालयको उन्नतिका लागि निरन्तर सहकार्य गर्ने प्रतिबद्धता जनाए ।
प्रधानाध्यापक सुवेदीले पूर्व विद्यार्थीहरूको यस योगदानलाई विद्यालयको इतिहासमा महत्वपूर्ण अध्यायका रूपमा लिँदै धन्यवाद व्यक्त गरे । उनले स्मारक निर्माणलाई समुदाय र विद्यालयबीचको सम्बन्ध सुदृढ गर्ने प्रेरणादायी कदमका रुपमा व्याख्या गरेका छन् ।
