भैरहवा । साहू–तेली कल्याण सेवा समिति, जिल्ला कार्यसमिति रुपन्देहीका अध्यक्ष रामवचन गुप्ताको निधन भएको छ । गुप्ताको सोमबार (हिजो) साँझ साढे ५ बजे उपचारको क्रममा भैरहवास्थित युनिभर्सल कलेज अफ मेडिकल साइन्सेज (युसीएमएस) मा उपचारका क्रममा निधन भएको समितिको रुपन्देहीका कोषाध्यक्ष दुर्गा प्रकाश गुप्ताले बताए । कोषाध्यक्ष गुप्ताका अनुुसार अध्यक्ष ७३ वर्षको उमेरमा निधन भएका रामवचन मृगौला, कलेजो लगायत समस्या भइ उपचाररत थिए ।
श्री महात्मा बुद्ध माध्यमिक विद्यालय व्यवस्थापन समितिका पूर्वअध्यक्ष समेत रहेका उद्योगी एवं समाजसेवी गुप्ताको निधनले उहाँको परिवारसँगै समाजलाई अपूरणीय क्षति पुगेको साहू–तेली कल्याण सेवा समिति रुपन्देहीका सचिव रामदयाल गुप्ताले बताए । उनले भने, ‘अत्यन्तै सरल र शालिन स्वभावका धनी साहू–तेली कल्याण सेवा समिति रुपन्देहीका अध्यक्ष रामवचन गुप्ताज्यूको निधनले हामी अत्यन्तै मर्माहत भएका छौं, समाजमा उहाँको अभाव खड्किरहन्छ ।’
सिद्धार्थनगर नगरपालिका–६ पिपरहिया निवासी स्वर्गीय रामवचन गुप्ता जगदम्बा राईस मिल सञ्चालन गर्दै आएका थिए । उनका श्रीमती, दुई छोरा र एक छोरी छन् ।
