स्याङ्जा । जिल्ला प्रहरी कार्यालय स्याङ्जाले अवैध सालको काठ ओसारपसारमा संलग्न एक जनालाई मिनी ट्रकसहित नियन्त्रणमा लिएको छ । सेतीदोभानबाट पोखरातर्फ सालको काठ लैजाँदै गरेको भन्ने विशेष सूचनाको आधारमा खटिएको प्रहरी टोलीले फेदीखोला गाउँपालिका वडा नम्बर २ सर्केटारीस्थित सिद्धार्थ राजमार्गमा चेकजाँच गर्दा अवैध काठ फेला पारेको हो ।
प्रहरीले ग १ ख नम्बरको मिनी ट्रकलाई रोकेर खानतलासी गर्दा सालको काठबाट बनेका तयारी ४ थान ढोकाको चौकोस र ४ थान झ्यालको चौकोस गरी जम्मा १६.८ क्युबिक फिट काठ बरामद गरेको छ । उक्त घटनामा संलग्न रहेको आरोपमा प्रहरीले मिनी ट्रक चालक स्याङ्जाको आँधिखोला गाउँपालिका–५ बाँसकोट बस्ने २७ वर्षीय कमललाई नियन्त्रणमा लिएको छ ।
बरामद गरिएको अवैध काठ, मिनी ट्रक र पक्राउ परेका चालकलाई आवश्यक थप अनुसन्धान तथा कानुनी कारबाहीका लागि डिभिजन वन कार्यालय स्याङ्जामा बुझाइएको जिल्ला प्रहरी कार्यालय स्याङ्जाका निमित्त सूचना अधिकारी एवं प्रहरी निरीक्षक कमल नेपालीले जानकारी दिएका छन् ।
