काठमाडौं । प्रहरी प्रधान कार्यालय नक्सालले बढ्दो साइबर अपराध र जोखिमलाई मध्यनजर गर्दै बृहत् अन्तरक्रिया कार्यक्रम आयोजना गरेको छ । ‘साइबर अपराधको वर्तमान अवस्था, चुनौति र समाधान’ विषयक कार्यक्रममा वरिष्ठ प्रहरी अधिकृतलगायत सरोकारवाला निकायका प्रतिनिधि र व्यक्तिहरुको उपस्थिति थियो ।
कार्यक्रममा अन्तर्राष्ट्रिय सूचना प्रविधि (आईटी) कम्पनी जेनिस सोलुसनका प्राविधिक प्रमुख निरञ्जन कुँवरले साइबर सुरक्षाबारे कार्यपत्र प्रस्तुत गरेका थिए । सो अवसरमा प्रहरीको साइबर ब्यूरो प्रमुख डीआईजी नवीन्द्र अर्याल, सूचना प्रविधि प्रमुख डीआईजी अरुण भण्डारी, एसएसपी ज्ञानेन्द्रराज राईलगायत प्रहरी प्रधान कार्यालयका विभाग, महाशाखाका उच्च प्रहरी अधिकारीको सहभागिता रहेको थियो ।
जेनिस सोलुसनका वरिष्ठ निर्देशक एवं आईटी इन्जिनियरहरु अमित जोशी, शरद बन्जरा, निर्वान पाल, सम्पन्न श्रेष्ठसमेत सहभागी कार्यक्रममा साइबर सुरक्षा सम्बन्धी राष्ट्रिय तथा अन्तर्राष्ट्रिय प्रयोग र सुरक्षा रणनीतिबारे छलफल भएको कम्पनीको भनाई छ ।
साइबर सुरक्षा जोखिम बढ्दै गइरहेको पछिल्लो समयमा प्रहरीले आयोजना गरेको यस खालको बृहत् कार्यक्रमलाई सकारात्मक मानिएको छ । नेपालसहित ११ वटा देशमा कार्यालय स्थापना गरी आईटी सेवा प्रवाह गरिरहेको जेनिससँगको सहकार्यमा अन्तरक्रिया कार्यक्रम आयोजना गरिएको हो । उक्त कम्पनीको प्रमुख अन्जनी फुँयाल नेपाली मुलका बेलायती हुन् ।
