भैरहवा । रुपन्देही जिल्लामा यस वर्षको तिहारमा देउसी-भैलो खेल्ने समयलाई कडाइ गरिएको छ। जिल्ला सुरक्षा समितिले प्रतिकूल सुरक्षा अवस्थालाई मध्यनजर गर्दै राति ९ बजेसम्म मात्र देउसी-भैलो खेल्न पाइने निर्णय गरेको हो । प्रमुख जिल्ला अधिकारी डा. टोकराज पाण्डेका अनुसार बसेको सुरक्षा समितिको बैठकले सामाजिक सद्भाव कायम राख्दै सुरक्षा व्यवस्था चुस्त दुरुस्त राख्न यो निर्णय गरेको हो।
समितिको निर्णय अनुसार देउसी-भैलोमा सहभागी हुनेले मर्यादित पोशाक लगाउनुपर्नेछ र मादक पदार्थ सेवन गर्न पाइने छैन।प्रमुख जिल्ला अधिकारी पाण्डेले देउसी-भैलोलाई व्यवस्थित गर्न सादा पोशाकमा सुरक्षाकर्मी परिचालन गरिने र सुरक्षा व्यवस्था खलबलिन नदिन तथा नागरिकलाई सुरक्षाको प्रत्याभूति गराउन यस्तो निर्णय गरिएको जानकारी दिए। विगतका वर्षहरूमा प्रशासनले राति १० बजेसम्म देउसी खेल्न अनुमति दिँदै आएको थियो।
