भैरहवा । रुपन्देहीको तिलोत्तमा नगरपालिका वडा नम्बर ६ मा रहेको एएसी ब्लक्सले आईएसओ ९००१ः२०१५ प्रमाणित कम्पनी भएको छ ।
शुक्रबार भैरहवामा एक कार्यक्रमका बिच ग्लोबल क्वालिटी काउन्सिलका नेपाल प्रतिनिधि नारायण प्रसाद दवाडीले आईएसओ लोगो प्रदान गरेका छन् । कम्पनीले आफ्नो उत्पादन गुणस्तर कायम राखेको र आवश्यक सूचकहरु पुरा गरेको हुदा आगामी ३ वर्षको लागि आईएसओ चिन्ह प्रदान गरिएको दवाडीले बताए ।
‘आईएसओ लोगोले उद्योगको उत्पादनलाई आमजनतामा अझै विश्वास बढाउँदै लैजाने छ’, उनले भने, ‘अहिलेको गुणस्तरलाई उद्योगले निरन्तरता दिन सक्नुपर्छ । जसले व्यवसायिक प्रबद्र्धनमा थप सहयोग मिल्नेछ ।’
यस संगै नेपालमै उत्पादित एएसी ब्लक्सलाई अन्य देशमा निर्यातको बाटो पनि खुलेको छ । तिलोत्तमाको पश्चिम पहुनीमा उद्योग रहेको यहाबाट दैनिक २० हजार ब्लक्स उत्पादन गर्ने क्षमता रहेको यसका अध्यक्ष एवम पूर्व सांसद प्रमोद कुमार यादवले जानकारी दिए । नेपालका बिभिन्न सरकारी परियोजनाहरुमा यसको सफल प्रयोग हुदै आएको र अबको लक्ष्य भनेको भारत निर्यातको रहेको यादवले बताए ।
जर्मनी प्रविधिबाट निर्माण भएको एएसी ब्लक्स प्रदुषण मुक्त भएकोले यस तर्फ उपभोक्ताहरु आकर्षित भएको उनको भनाई छ । उच्च गुणस्तर युक्त एएसी ब्लक्स हलुका तौल, ध्वनी प्रतिरोधक, ओस, अग्नि र भुकम्प प्रतिरोधक साथै पराम्परा गत ईट्टाको तुलनामा दिगो एवम सस्तो पर्ने यसका अध्यक्ष यादवको दावी छ ।
एएसी ब्लक्स बारे जानकारी दिदै यसका विक्रि प्रवन्धक दिपक भट्टराईले थर्मल ईन्सुलेन्स भएको ब्लक्सहरुबाट घर निर्माण गर्दा निर्माण सामाग्रीको साथै समयको पनि वचत हुने हुदा यो पराम्रागत ईट्टा भन्दा सस्तो र गुणस्तरिय रहेको बताए । यहि साउन देखि उत्पादन थालेको एएसी ब्लक्सको माग उच्च रहेको छ ।
हाललाई एएसी ब्लक ४, ६ र ८ इन्चको उत्पादन गरिरहेको कम्पनीले जनाएको छ । ‘आवश्यकताका आधारमा अन्य साइजका पनि उत्पादन गर्ने तयारीमा छौं’, भट्टराईले भने । उनका अनुसार निर्माणका क्रममा जोडाइपछि भिजाउन नपर्ने, मजबुत पकड, पातलोतह–हलुका बचत, श्रमलागत र समयको बचत, काम गर्न सजिलो, उच्च भारबहन क्षमता यसका विशेषता हुन् । एएसी ब्लकको आयु ८० देखि सय वर्ष हुने कम्पनीले दावी गरेको छ ।
कम्पनीका सन्चालक धिरज मल्लिकको अध्यक्षता तथा प्रमुख कार्यकारी अधिकृत साजन भट्टराईको सञ्चालनमा कार्यक्रम सम्पन्न भएको थियो ।
